Më shumë se sa nga lëvizjet demografike, çmimet e banesave në vend janë shtrenjtuar nga shtimi i kërkesës për blerje të apartamenteve nga shqiptarët që jetojnë jashtë.
Në këtë përfundim ka arritur Banka e Shqipërisë, në një studim ku analizohen faktorët që kanë shtrenjtuar me mbi 14 mijë lekë qiratë në Tiranë në 5 vitet e fundit.
“Trendi është rritës, veçanërisht nga jashtë. Mendoj se mund të ketë një stabilizim, por jo një frenim të rritjes. Mund të kemi një stabilizim, por jo frenim të rritjes pasi kërkesa vijon veçanërisht nga jashtë”, tha Ervin Demirxhiu, agjent imobiliar.
Sipas analizës së Bankës së Shqipërisë, rritja e të ardhurave si pasje e pagave më të larta dhe kushtet ende të favorshme të kreditimit gjithashtu kanë ndikuar në rritjen e kërkesave për blerje duke shtrenjtuar rrjedhimisht çmimet.
“Edhe muaji i dytë i vitit jep sinjale për zgjerim të kërkesave për apartamente. Ka ende më shumë kërkesës e ofertë dhe rrjedhimisht çmimet në rastin më të mirë do të mbesin të larta”, shtoi Erjon Alimema, agjent imobiliar.
Këto gjetje konfirmohen edhe nga të dhënat e kreditimit. Huaja e re për blerje banesash arriti rekordin e ri prej 48.5 miliardë lekësh vitin e shkuar, gati 2-fish më shumë se në 2019-n.
“Veçanërisht kredia merret në Tiranë, për të blerë apartamente në Kryeqytet. Familjet e reja kryesishit”, theksoi Alimema.
“Po merret kredi jo vetëm për të blerë, por si formë investimi në “AirBnb”. Ka shumë kërkesë ende. Po konsiderohet biznes”, bëri me dije Demirxhiu.
Të dhënat nga Banka Qendrore treguan se blerjet nga jashtë të apartamenteve kryesuan investimet e huaja për të dytin vit me radhë gjatë 2023-shit. Investimet e huaja për blerje pasurish të paluajtshme arritën në 222 milionë euro deri në fund të shtatorit të vitit të shkuar./ S.M
