Eksperti amerikan i cili studion pandemitë, Gerald Parker, thekson se koronavirusi nuk mbaron me këtë valë pandemike që ka pushtuar botën.
Parker, i cili drejton programin e biosigurisë dhe politikave publike të pandemisë në ‘Bush’s School’, si dhe njëherësh dekan i asociuar i “Global One Health”, shpjegon se si pandemia që po kalon bota ka të paktën 5 faza.
Faza e parë sipas tij është kontrolli, kur ne përpiqemi të mbajmë nën kontroll koronavirusin që të mos kalojë nga një person tek një tjetër.
Parker shpjegon se bota pasi ka kaluar fazën e parë atë të kontrollit, tani ndodhet në fazën e dytë, që është ajo e zbutjes.
Sipas tij, kjo fazë kërkon të ngadalësojë përhapjen e virusit në komunitetin ku jetojmë.
Kjo fazë është e rëndësishme sipas tij, pasi nëse rregullat ndiqen siç duhet atëherë spitalet nuk do të mbingarkohen nga pacientë të tjerë që mund të preken me covid-19.
Ky është qëllimi i masave të ashpra, sipas tij, që lidhen me distancimin social, mbylljen e shkollave, universiteteve dhe shmangien e tubimeve të mëdha.
Faza e tretë lidhet me gjetjen e një vaksine për të frenuar koronavirusin. Eksperti Parker thotë se “Unë jam optimist se deri në tre apo gjashtë muajt e ardhshëm do të kemi një vaksinë për të trajtuar koronavirusin. Por, unë mendoj se do të duhen të paktën 18 muaj për ta hedhur në qarkullim dhe për ta vendosur në dispozicion”.
Faza e katërt është faza e kontrollit, pasi të kemi siguruar vaksinën. “Ne do ta përjetojmë situatën e koronavirusit ashtu siç përjetojmë gripin sezonal, pasi nuk mendoj se COVID-19 mund të largohet aq lehtë. Për më tepër unë mendoj se do të kemi një valë të dytë të koronavirusit në vjeshtë”, shprehet Parker.
Faza e pestë lidhet me përgatitjen. Sipas ekspertit Parker, çdo vend duhet t’i japë përparësi sigurisë kombëtare dhe shëndetit të qytetarëve.
“Fatkeqësisht, kemi hyrë në një periudhë kur sëmundjet infektive në zhvillim po rriten me një frekuencë alarmante. Kthehuni te koronavirusi i parë dhe kujtoni problemet kryesore me SARS në vitin 2000 deri në vitin 2003. Kjo duhej të ishte një alarm për botën që të përgatitej për këtë gjë që po kalojmë sot”, shprehet Parker./Përshtati nga The Houston Chronicle, për Fjala. al, Bardhi Quku
