Testimi masiv nuk u përzgjodh nga Këshlli Teknik i mjekëve në Shqipëri si strategjia e nevojshme për t’u përballur me koronavirusin. E shumë ekspertë tani po kritikojnë pikërisht këtë veprim si shkakun kryesor përse, ndryshe nga shtetet e tjera të Evropës, në Shqipëri kurba e infektimeve nuk mund të lexohet për shkak të luhatjeve të rasteve të reja.
Statistikat tregojnë se për nga niveli i testeve, Shqipëria krahasohet me mikro-shtetet e Evropës që kanë nga 30 mijë deri në 600 mijë banorë.
4,827 testet e realizuara në Shqipërinë me 2 milion e gjysmë banorë janë më pak se 5,765 testet e realizuara në Ishujt Faroe me 48 mijë banorë.
Malta ka 493 mijë banorë, por deri më tani ka realizuar 21,164 teste, apo Luksemburgu që ka kryer 31,660 teste në popullsinë e tij prej 613 mijë banorë.
Në rajon, Shqipëria është vetëm mbi Malin e Zi sa i përket numrit total të testeve. Fqinji ynë verior që ka 631 mijë banorë ka realizuar 3,874 teste, ndërkohë që situata në vend paraqitet e normalizuar.
Kosova, Maqedonia e Veriut apo Serbia kanë realizuar më shumë teste se Shqipëria dhe Mali i Zi./Fjala.al
Shtetet dhe territoret që kanë realizuar më pak teste në Evropë
- San Marino – 846 teste (33,785 banorë)
- Lihtenshtajn – 900 teste (38,557 banorë)
- Gjibraltar – 1,649 teste (33,718 banorë)
- Andorra – 1,673 teste (77,006 banorë)
- Isle of Man – 2,261 teste (84,077 banorë)
- Channel Islands – 3,320 teste (170,499 banorë)
- Mali i Zi – 3,874 teste (631,219 banorë)
- Shqipëria – 4,827 teste (2,845,955 banorë)
- Ishujt Faroe – 5,765 teste (48,497 banorë)
- Moldavia – 9,208 teste (2,681,735 banorë)
- Maqedonia e Veriut – 10,422 teste (2,077,132 banorë)
- Bosnje-Hercegovina – 14,743 teste (3,511,372 banorë)
