“Kosova është në baltë dhe ju më thoni nxirreni Kosovën nga balta. Unë ndërgjegjën e kam të pastër, por duart i kam me baltë sepse kam futur duart për të nxjerrë Kosovën nga balta.”
Ky është qëndrimi që Albin Kurti, kryeministër në detyrë i Kosovës, mbajti gjatë diskutimit në emisionin “Debat Plus”, teksa po kritikohej për emërimet e drejtuesve të përkohshëm të ndërmarrjeve publike. Më pak se 15% e drejtuesve të përkohshëm të emëruar në këto borde rezultojnë me karta anëtarësie të Lëvizjes Vetëvendosje, ndërkohë që Kurti kishte premtuar gjatë fushatës se diçka e tillë nuk do të ndodhte nëse ai bëhej kryeministër.
Kurti tha sot se këta drejtues janë të përkohshëm dhe nuk janë përzgjedhur me konkurs për shkak se ndërmarrjet po humbisnin miliona euro në mungesë të një kryetari. Sipas Kurtit, konkurset do të zhvilloheshin normalisht nëse nuk do të kishte ndodhur mocioni i mosbesimit ndaj Qeverisë së tij.
Lidhja Demokratike doli nga koalicioni me LVV, ndërkohë që Kurti dhe presidenti Hashim Thaçi po përplasen vazhdimisht sa i përket të ardhmes së Qeverisë. Kurti kërkon zgjedhje të parakohshme, ndërkohë që Thaçi pritet t’i ofrojë LDK-së mundësinë për të zgjedhur kryeministrin e ri me një koalicion të përbashkët me AAK-në e Ramush Haradinajt.
