Policia Kufitare në Portin e Sarandës ka arrestuar një shtetas italian, pasi i janë gjetur në makinë armë.
Përpos armëve, italianit i janë gjetur edhe dorashka e kapuçë në formën e maskës. Materialet në ngarkim të shtetasit italian i kaluan Prokurorisë.
“SPK Port Sarandë/Kontrolle intensive nga shërbimet e Policisë Kufitare në Portin e Sarandës, në bashkëpunim me Komisariatin e Policisë Sarandë, për parandalimin, evidentimin dhe goditjen e paligjshmërisë.
Vihet në pranga 1 shtetas italian, pasi në dalje të RSH-së, iu gjetën në automjet, disa armë të ftohta që i posedonte në kundërshtim me ligjin.
Shërbimet e SPK Port Sarandë, në vijim të kontrolleve për goditjen e paligjshmërisë, bazuar në analizën e riskut dhe në kontrollet me përzgjedhje, në dalje të RSH-së, kanë kaluar në vijën e dytë, për kontroll më të imtësishëm, automjetin me drejtues shtetasin italian M. M.
Gjatë kontrollit në këtë automjet, shërbimet e Policisë gjetën dhe sekuestruan disa armë të ftohta, dorashka dhe kapuça në formën e maskës.
Në përfundim të veprimeve, specialistët për Hetimin e Krimeve të Komisariatit të Policisë Sarandë arrestuan në flagrancë shtetasin italian M. M., 46 vjeç, banues në Itali.
Materialet i kaluan Prokurorisë, për veprime të mëtejshme”, njofton policia. S.B
