Evropianët do të gjejnë ‘zgjidhje të zgjuara’, për të bërë pushime verore këtë vit, tha Presidentja e Komisionit Evropian, Ursula von der Leyen, në një intervistë për “Expresso Sunday”.
Megjithëse një javë më parë Presidentja e KE u tha qytetarëve që të mos rezevojnë ende për pushime verore, në këtë intervistë Von Der Leyen thotë se pushimet do të bëhen, por pak më ndryshe.
“Unë mendoj se do të gjejmë zgjidhje të zgjuara për të pasur pushime verore. Ndoshta pak më ndryshe, me masa të tjera higjienike, me një distancë pak më shumë sociale, por do të shohim që do të gjejmë zgjidhje,” tha Von der Leyen.
Presidentja e komisionit tha se “është mirë” që vendet e BE-së kanë filluar të “heqin masat kufizuese”, por paralajmëroi se qeveritë duhet të ecin përpara “me kujdes, hap pas hapi dhe gjithmonë me vigjilencë”.
Këtë javë, Komisioni Evropian publikoi udhëzime për të përmirësuar koordinimin midis 27 kryeqyteteve në heqjen e masave kufizuese.
“Është e vështirë të parashikosh se si do të jenë muajt e ardhshëm, por ajo që unë shoh është se ne kemi filluar të mësojmë të jetojmë me virusin”, tha von der Leyen, duke shtuar se ajo është “habitur” me zgjidhjet që kanë gjetur disa sektorë ekonomikë që të funksionojnë.
