Pas presidentit amerikan Donald Trump, atij francez Emanuele Macron, edhe kancelarja gjermane, Angela Merkel lë të kuptohet se Kina ka mashtruar botën rreth koronavirusit.
Sipas medieve gjermane, kancelarja gjermane i kërkoi Pekinit të jetë transparent në lidhje me origjinën dhe transmetimin fillestar të koronavirusit.
“Unë besoj se sa më transparente të jetë Kina në raport me historinë e origjinës së virusit, aq më mirë është për të gjithë botën në mënyrë që të nxjerrim mësime prej këtij rasti”.
Gjermania ka shënuar deri më tani 4,648 vdekje po aq sa vetë Kina– me 4,636, edhe pse kjo e fundit është akuzuar se ka mashtron me shifrat e të vdekurve dhe të infektuarve.
Gjithashtu edhe presidenti amerikan Donald Trump dhe shumë figura të politikës amerikane kanë hedhur dyshime në të dhënat e të prekurve dhe atyre që kanë ndërruar jetë në Kinë.
Nga ana e saj, kancelarja Angela Merkel i kërkoi Kinës transparencë, ndërsa Gjermania vijon të tregojë kujdes me masat. Sipas Merkelit, vendi do të detyrohet të izolohet i gjithi nëse rastet me koronavirus fillojnë sërish të rriten me shpejtësi.