Rojet bregdetare të Shteteve të Bashkuara ndanë një imazh të tmerrshëm të nëndetëses Titan, duke zbuluar pasojat e shpërthimit të saj katastrofik për herë të parë që nga ngjarja tragjike.
Imazhi u shfaq ndërsa hetuesit nisën një seancë të hënën, duke u hulumtuar incidentin tragjik, më shumë se një vit më pas, raportoi CNN.
Qershorin e kaluar, nëndetësja pati fund tragjik gjatë një zhytjeje fatkeqe në anijen e mbytur Titanik, duke marrë jetën e pesë individëve në bord.
Fotoja, e marrë gjatë një misioni kërkimi në qershor të vitit të kaluar, zbulon konin e bishtit të copëtuar të nëndetëses në mes të thellësive të errëta të Oqeanit Atlantik të Veriut. Koni i bishtit të prerë, me skajet e tij të dhëmbëzuara, shtrihet pranë një pjese të këputur të anijes, disa qindra metra larg vendndodhjes së Titanikut, sipas hetuesve në seancën dëgjimore në Charleston të Veriut, Karolina e Jugut.
Seanca pritet të zgjasë deri më 27 shtator.
Mesazhi i fundit dhe fotoja e nëndetëses Titan publikohen një vit
Në prezantimin e tij hapës, Bordi Detar i Hetimit tha se koni i bishtit dhe mbeturinat e tjera u gjetën nga një mjet i drejtuar nga distanca më 22 qershor të vitit të kaluar. Ai tha se imazhi ofron “prova përfundimtare” se nëndetësja përjetoi një shpërthim katastrofik – një kolaps i papritur nga brenda i shkaktuar nga presioni i jashtëzakonshëm.
Shpërthimi mori jetën e Stockton Rush, themeluesi dhe CEO i operatorit të anijes; biznesmenit Shahzada Dawood dhe djalit të tij 19-vjeçar, Suleman Dawood; aventurierit Hamish Harding; dhe zhytësit francez Paul-Henri Nargeolet.
Mbetjet e gjetura u përshtatën me pesë burrat në bord përmes testimit dhe analizës së ADN-së, konfirmoi të hënën Bordi Detar i Hetimit.
Bordi thirri të hënën dëshmitarët e tij të parë, duke përfshirë ish-punonjësit e OceanGate – firma që zhvilloi dhe operoi zhytësin. Prezantimi zbuloi gjithashtu mesazhin përfundimtar të nëndetëses – vetëm gjashtë sekonda para se të humbiste kontaktin me sipërfaqen.
“Hodhëm dy pesha,” lexonte teksti i Titanit për anijen e tij mëmë, duke iu referuar peshave që nëndetësja mund të heqë me shpresën për t’u kthyer në sipërfaqe. Sekonda më vonë, Titani “u përgjua” për herë të fundit dhe anija mëmë humbi gjurmët e nëndetëses.
Ndërsa qëllimi kryesor i seancës dëgjimore është “zbulimi i fakteve rreth incidentit”, kryetari i bordit Jason Neubauer pranoi se grupi është gjithashtu i ngarkuar me identifikimin e “sjelljes së keqe ose neglizhencës nga marinarët kredencialë”.
“Dhe nëse ka ndonjë zbulim të një akti kriminal, ne do t’i bëjmë një rekomandim Departamentit të Drejtësisë,” tha ai./e.t
