Rusia është përpjekur të përdorë Brexit-in për të mbjellë mosmarrëveshje midis Irlandës dhe Mbretërisë së Bashkuar dhe për të përhapur propagandën e Kremlinit në Evropë. Ashtu si në një film, Rusia do ta kishte bërë fillimisht përmes një spiuni të dërguar në Dublin me synimin për të gjetur bashkëpunëtorë të mundshëm mes politikanëve vendas, dhe më pas duke përdorur edhe një grua që filloi një lidhje romantike me njërin prej tyre pikërisht me qëllimin për të ndikuar tek ai.
Lajmi u botua fillimisht nga gazeta britanike Sunday Times dhe më pas u konfirmua pjesërisht nga kryeministri irlandez Simon Harris, pa bërë megjithatë publik identitetin e politikanit, i cili sipas thashethemeve do të ishte anëtar i opozitës së majtë.
Një spiun në ambasadë
Siç raportohet nga The Times, spiuni ishte Sergey Prokopiev, i cili zyrtarisht punoi si këshilltar në ambasadën ruse në Orwell Road në Dublin. Në realitet ai ishte një oficer i inteligjencës ushtarake të nivelit të lartë i dërguar në Irlandë nga forcat e armatosura të Vladimir Putinit për të vepruar nën mbulimin diplomatik. Misioni i tij ishte të rekrutonte dhe menaxhonte agjentë, burime nga bota e politikës, biznesit dhe medias, por edhe përfshirja në ato që rusët i quajnë “masa aktive”. Pavarësisht përvojës së tij kundër spiunazhit, ai nuk e kuptoi se ai vetë ishte nën vëzhgimin e shërbimeve sekrete vendase.
Me mbërritjen e tij në Irlandë në mars 2019, Prokopiev u përqendrua në rindërtimin e rrjetit të inteligjencës ruse në të dy anët e kufirit dhe synoi të ndërtonte kontakte me grupet paramilitare besnike dhe republikane të Irlandës së Veriut, të cilat kishin lindur gjatë negociatave të Brexit midis vendeve të Unionit dhe Britanisë së Madhe. Besnikët kërcënuan me dhunë gjatë negociatave të ndarjes, duke kundërshtuar krijimin e një kufiri të padukshëm në Detin Irlandez, dhe republikanët bënë të njëjtën gjë kundër mundësisë së kthimit në një kufi tokësor. Kremlini donte të nxiste flakët e tensioneve për të destabilizuar marrëdhëniet midis Irlandës dhe Britanisë së Madhe
Zyrtarët e inteligjencës ruse janë ekspertë në rekrutimin e atyre që ata i quajnë “idiotë të dobishëm”, njerëz që veprojnë në interesat e tyre dhe që mund të shfrytëzohen lehtësisht. Mes tyre do të kishte qenë edhe deputeti, me pseudonimin “Kobalt”. Sidoqoftë, burri nuk mori para në asnjë formë nga Moska dhe nuk ndante dokumente të ndjeshme. Por, siç shpjegon gazeta britanike, spiunët rusë studiojnë objektivat e tyre, duke kërkuar për çdo dobësi personale që mund ta përdorin për të bindur një person për të bashkëpunuar, qoftë edhe në mënyrë naive, dhe përveç parave, edhe aspektet e tjera kryesore që i bëjnë njerëzit psikologjikisht të cenueshëm ndaj rekrutimit.
Por edhe ndjenjat e dashurisë, ose të paktën epshi. Kur Moska filloi pushtimin e saj të Ukrainës në shkurt 2022, Irlanda dëboi katër diplomatë rusë të akuzuar për rekrutimin e bashkëpunëtorëve të inteligjencës brenda komunitetit politik dhe të biznesit irlandez. Midis tyre Sergej Prokopiev.
Por Sunday Times raportoi se, pas dëbimit të tij, ai vazhdoi të koordinonte aktivitetet me deputetin irlandez përmes një agjenteje ruse të dërguar periodikisht në Dublin për të ndjekur një marrëdhënie romantike me politikanin, një i ashtuquajtur ‘kurth i mjaltit’.
Kur gazetarët e pyetën Harrisin nëse një agjent i inteligjencës ruse po vepronte me të vërtetë brenda Parlamentit, shefi irlandez tha se nuk mund ta konfirmonte informacionin, por shtoi: “nuk duhet të jetë befasi për asnjërin prej nesh”.
“Rusia kërkon të shtrembërojë opinionin publik dhe është aktive në këtë drejtim në mbarë botën. Irlanda nuk është imune ndaj kësaj,” shtoi Harris./e.t
