“Spera”, autobiografia e Papa Françeskut, e para e shkruar nga një Papë në histori, do të dalë në janar 2025, njëkohësisht në mbarë botën në më shumë se 80 vende. Njoftimi u bë të mërkurën në Panairin e Librit në Frankfurt nga Mondadori, e cila menaxhon të drejtat në mbarë botën.
Vëllimi do të pasurohet me disa fotografi, përfshirë ato private dhe të pabotuara, të Atit të Shenjtë.
Libri tregon historinë e jetës së Françeskut, që nga rrënjët e tij italiane dhe emigracioni i të parëve të tij në Amerikën Latine, tek fëmijëria, adoleshenca, zgjedhja e profesionit dhe jeta si i rritur, duke mbuluar të gjithë papatin deri në ditët e sotme.
Papa, përmes tregimit të tij autobiografik, trajton edhe çështjet më të rëndësishme dhe më të debatuara të kohës bashkëkohore, si dhe çështjet vendimtare të shërbimit të tij si pastor universal i kishës.
“Libri i jetës sime është historia e një udhëtimi shprese që nuk mund ta imagjinoj të ndarë nga ai i familjes sime, i popullit tim, i të gjithë njerëzve të Zotit. Në çdo faqe, në çdo hap, është edhe libri i atyre që ecën me mua, i atyre që na paraprinë, i atyre që do të na ndjekin”, shkruan Françesku në një shënim për botimin e vëllimit.
Papa dhe bashkë-shkrimtari i tij i zgjedhur, botuesi italian Carlo Musso, kanë punuar për librin për gjashtë vitet e fundit. Plani fillestar ishte botimi pas vdekjes së tij, por Jubileu 2025 – një kohë kushtuar faljes, rinovimit shpirtëror dhe kremtimit në kishën katolike që ndodh çdo 25 vjet – si dhe nevojat e kohës, e shtynë Papën ta publikojë atë sa është ende gjallë./K.B
