Disa kërkime nga Hungaria kanë zbuluar një ngjashmëri të habitshme mes njerëzve dhe qenve pasi të dy mund të qëndrojnë zgjuar natën, duke u shqetësuar dhe duke menduar për stresin e ditës.
Një studim i publikuar në revistën shkencore “The Royal Society” tregon se qentë gjithashtu hasin vështirësi në gjumë pas përjetimeve emocionale apo stresuese që kanë pasur gjatë ditës.
Në këtë eksperiment, studiuesit monitoruan aktivitetin e trurit të 16 qenve pas disa ditëve me përvoja pozitive ose negative. Ditët pozitive përfshinin përkëdhelje dhe lojë me top, ndërsa ditët negative përfshinin ndarje nga pronarët ose lidhje për pak kohë. Rezultatet treguan se qentë që përjetuan stres kishin ndryshime të dukshme në gjumë pas një gjumi të shkurtër prej tre orësh. Ata kaluan mesatarisht 20 minuta më shumë në gjumin REM, faza e cila karakterizohet nga ëndrrat e gjalla. Gjithashtu, këta qen u zgjuan më shpejt se ata që kishin pasur ditë të qeta.
Një përvojë e vetme negative nuk pritet të shkaktojë probleme të mëdha me gjumin, por stresi i vazhdueshëm mund të çojë në çrregullime të gjumit te qentë. Kjo nënvizon rëndësinë e krijimit të një ambienti të qetë dhe mbështetës për shokët tanë katërputrosh, pasi streset e përhershme mund të ndikojnë negativisht në shëndetin e tyre.
Si pronarë të qenve, është e rëndësishme të kuptojmë se ata ndiejnë stres po ashtu si ne. Pas një dite të zënë, mos harroni t’i ofroni qenit tuaj dashuri dhe vëmendje shtesë. Veprimet e thjeshta si përkëdheljet, shëtitjet qetësuese ose lojat mund të ndihmojnë në përmirësimin e humorit dhe cilësisë së gjumit të tyre. Në përfundim, lidhja që kemi me qentë tanë përfshin kuptimin e nevojave të tyre emocionale. Pra, herën tjetër kur ndiheni të stresuar, mendoni edhe për ndjenjat e qenit tuaj dhe përpiquni të krijoni një ambient paqësor për të dyja palët./E.Ç
