Investimet në veprat strategjike rrugore si Korridori 8 apo edhe ai Blu do të jenë prioritetet kryesore të buxhetit të Ministrisë së Infrastrukturës dhe Energjisë në vitin 2025.
Ministrja Belinda Balluku nga Komisioni i Veprimtarisë Prodhuese shpjegoi dhe planin e shpenzimeve për vitin e ardhshëm, të cilat shkonin më së shumti në projekte të rëndësishme rrugore.
“Korridori 8 dhe korridori blu mban pjesën më të rëndësishme. Kërkojmë të përmirësojmë qëndrueshmërinë midis rajoneve por edhe ndërlidhjes kufitare.
Infrastruktura rrugore është prioritet kryesor i qeverisë kjo reflektohet edhe në buxhetin afatmesëm. Në 2025 i akordon për transportin rrugor 33.48 miliardë lekë rritje 14% krahasuar me vitin aktual. Deri në 2027 37 miliardë lekë për transportin rrugor.
ARRSH mirëmban 3 mijë e 600 km rrugë në Shqipëri 1358 primare 2235 sekondare. E pamundur të financojë të gjithë pjesën që duhet të shkojmë për mirëmbajtjen e rrugës. E axhustojmë gjatë pjesës tjetër të vitit”, tha ministrja
Ministrja renditi një sërë projektesh të rëndësishme që do të vijojnë dhe financohen në vitin 2025 por dhe afatet se kur do të dorëzohen.
“Projekti koncesionar është ai për Rrugën e Arbrit sipas afateve dhe problematikave në tunelin e Murrizit, kemi shpresë të hapet në fund të vitit, por sipas afateve duhet të dorëzohet në mars 2025. Shlyerja e këtij projekti përfundon në 2031. Tjetër është autostrada Milot-Morinë. Kemi dorëzuar urën e Kukësit 40 milionë euro investime. Shlyerja financiare do të jetë në vitin 2031. Projekti 3 koncensionar byppasi Orikum-Dukat ka përfunduar në 2024, shlyerja do të përfundoj në 2033. Nga buxheti financohet Elbasan-Qaf Thanë”, shtoi Balluku.
Përtej rrugëve një pjesë e buxhetit është dedikuar edhe për hekurudhat.
“Hekurudha Tiranë-Durrës dhe lidhja me Aeroportin Ndërkombëtar të Tiranës, hekurudha Vorë – Hani i Hotit, Durrës – Rrogozhinë, Rrogozhinë-Vlorë, Aeroport i Vlorës – Qendër e qytetit dhe më gjerë, apo studimi për ndërtimin e hekurudhës Tiranë-Shkodër-Gjakovë, janë projektet më të mëdha hekurudhore në Shqipëri”, tha ajo.
Buxheti për Ministrinë e Infrastrukturës dhe Energjisë zë dhe pjesën më të mëdha të financimeve për vitin 2025 pas atij të mbrojtjes sociale. Është 7.6 miliardë lekë më shumë se në 2024 duke arritur në 74 miliardë lekë./e.t
