Presidenti Ilir Meta ka komentuar përsëri iniciativën Mini-Schengen, duke vënë theksin te gjithë përfshirja e vendeve të Ballkanit Perëndimor. Sipas tij, nëse një platformë e cila nuk përjashton dhe përçan vendet rajonale, është e mirëpritur.
Meta shtoi se iniciativat të cilat provokojnë debate, nuk janë të dobishme për bashkëpunim. Presidenti nuk ka harruar pa përmendur shtetin e Kosovës ku sipas tij jo vetëm që është funksional, por edhe një shembull në gjithë rajonin, i cili ende vuan autoritarizmi dhe pamundësimi i zgjedhjeve tërësisht të lira.
“Çdo platformë rajonale bashkëpunimi, që është gjithëpërfshirëse dhe jo përjashtuese, që udhëhiqet nga partneriteti dhe jo paternalizmi, që sjell kohezion dhe jo konfuzion, e aq më tepër përçarje, dhe që ka vetëm për qëllim integrimin e Ballkanit Perëndimor në Bashkimin Europian është e mirëpritur. Ky duhet të jetë një parakusht për të promovuar dhe konsideruar iniciativa rajonale premtuese dhe të dobishme. Çdo iniciativë që provokon debate të panevojshme nuk e ndihmon bashkëpunimin tonë. Askush nuk ka pse keqpërdoret për të defaktorizuar Kosovën.
Prishtina ka udhëheqësit e saj të zgjedhur me votën e qytetarëve të saj. Shqipëria, për fat të keq, nuk ka se çfarë t’i mësojë Kosovës, as sa i përket shtetit ligjor, as sa i përket zgjedhjeve e pluralizmit politik, apo qoftë sa i përket demokracisë.
Shteti i Kosovës është jo vetëm tërësisht funksional, por edhe një shembull i demokracisë në rritje, në një rajon që ende vuan nga autoritarizmi dhe pamundësimi i zgjedhjeve tërësisht të lira”, tha Meta./Fjala.al
