Ukraina ka arrestuar kryepsikiatrin e ushtrisë me akuzën për “pasurim të paligjshëm” në lidhje me fitimet prej më shumë se 1 milion dollarësh, të grumbulluara që nga fillimi i pushtimit rus në shkurt të vitit 2022.
Në një deklaratë, Shërbimi i Sigurisë së Ukrainës (SBU) tha se ai ishte pjesë e një komisioni që vendoste nëse individët ishin të përshtatshëm për shërbimin ushtarak.
Deklarata e SBU nuk e përmend emrin e tij – megjithatë, një person i quajtur Oleh Druz ishte identifikuar më parë si kryepsikiatri i Forcave të Armatosura të Ukrainës.
SBU tha se ai zotëronte tre apartamente në ose afër Kievit, një në Odesa, dy parcela toke dhe disa makina luksoze BMW, dhe hetuesit që kontrolluan shtëpinë e tij gjetën gjithashtu 152.000 dollarë dhe 34.000 euro në para të gatshme.
Në deklaratë thuhet se personi nuk e ka deklaruar pasurinë, e cila ishte e regjistruar në emër të gruas, vajzës, djemve dhe personave të tjerë të tretë.
Ai tani përballet me dhjetë vjet burg për akuzat për pasurim të paligjshëm dhe deklarim të rremë.
Druz u implikua në një rast të ngjashëm në vitin 2017, ku ai nuk deklaroi dy fuoristrada dhe disa prona, duke e bërë atë të pezullohej nga detyra.
Ukraina ka luftuar prej kohësh korrupsionin endemik.
Në maj, një deputet ukrainas u akuzua për përvetësim të 220.000 sterlinave, ndërsa në vitin 2023 më shumë se 30 zyrtarë të rekrutimit, të akuzuar për marrje ryshfeti dhe kontrabandë njerëzish jashtë vendit, u pushuan nga puna në një spastrim kundër korrupsionit.
Vitin e kaluar, parlamenti ukrainas votoi për shfuqizimin e komisioneve mjekësore ushtarake pasi disa zyrtarë u akuzuan për marrje ryshfeti në këmbim të lëshimit të përjashtimeve nga shërbimi ushtarak./K.K
