Si një mikpritës i mirë, Donald Trump nuk i lejoi të ftuarit në inaugurimin e tij të dytë si president i Shteteve të Bashkuara të largoheshin duarbosh. Media Page Six ka zbuluar përmbajtjen e çantës së dhuratave që morën të pranishmit për të kujtuar këtë ditë historike. Disa prej tyre kanë nisur të publikojnë edhe imazhe të dhuratave të marra në rrjetet sociale ndërsa të tjerë kërkojnë të përfitojnë prej tyre duke i shitur në platformat online.
Dhurata që duket se ka qenë më e suksesshmja është një shishe përkujtimore Diet Coke, e preferuara e Trump, e cila erdhi me një etiketë të veçantë me tekstin e mëposhtëm: “Inaugurimi i presidentit të Shteteve të Bashkuara, Donald J. Trump, 20 janar , 2025.”
Vetë presidenti mori një kopje të edicionit special nga James Quincey, president dhe CEO i kompanisë disa ditë para inaugurimit. Kjo shishe tani shitet për çmime që i kalojnë 1000 dollarët në platforma të tilla si Ebay.
Çanta e dhuratës erdhi së bashku me një kartolinë falënderimi me mesazhin e mëposhtëm: “Faleminderit që morët pjesë në inaugurimin e Trump Vance. Ju lutemi shijoni këto dhurata si shenjë vlerësimi.”
Përveç pijes së gazuar, brenda paketës ishte një medalje përkujtimore në një stendë druri me fytyrat e Trump dhe zëvendëspresidentit të tij, JD Vance, si dhe një monedhë speciale e kuqe dhe ari me gdhendjen e Kapitolit pranë emrave të dy protagonistët e ceremonisë.
Çanta përfshinte gjithashtu një palë fotografi të nënshkruara të Trump dhe Vance, një kuti ore dhe një ditar lëkure të kuqe me thekse ari, të gjitha të gdhendura me siluetën e ndërtesës së Kapitolit; një stoli Krishtlindjesh në formën e Shtëpisë së Bardhë; një palë kunja me numrin 47 plot diamante dhe një tjetër rrethore me siluetën e Kapitolit dhe emrat e Trump dhe Vance.
Mes dhuratave nuk munguan as enë të dobishme për ditën, si krem duarsh dhe dezinfektues, balsam buzësh, filxhan, batanije, peshqir fytyre apo ngrohës duarsh, në përputhje me temperaturat e ulëta të regjistruara ditën e inaugurimit. .
Për të marrë në shtëpi të gjitha detajet, brenda paketës ishte një çantë e madhe pëlhure përkujtimore me, përsëri, vizatimin e Kapitolit. / S,M
