Një profeci e lashtë, e ruajtur për shekuj në Arkivin Sekret të Vatikanit, po trondit botën me parashikimin e saj: Gjykimi i Fundit do të ndodhë në vitin 2027. Sipas një libri të shekullit të 12-të, të cilin historia ia atribuon peshkopit irlandez Saint Malachy, viti 2027 do të shënojë ardhjen e dytë të Jezu Krishtit dhe shkatërrimin e Tokës dhe Qiellit.
Dokumenti i njohur si “Profecia e Papëve” u zbulua në vitin 1590 nga murgu benediktin Arnold Wion dhe përmban 112 fraza misterioze në latinisht, të cilat pretendojnë se parashikojnë të gjithë papët katolikë, nga Celestine II deri te Papa Françesku. Një pasazh i veçantë, që i atribuohet Papa Sixtus V, lë të kuptohet se fundi i botës do të vijë 442 vjet pas sundimit të tij – pikërisht në 2027.
Spekulimet janë intensifikuar për shkak të shëndetit të përkeqësuar të Papa Françeskut. 88-vjeçari është trajtuar për pneumoni të dyfishtë, duke kaluar një muaj në spital, dhe disa besojnë se ai mund të jetë papa i fundit para ngjarjeve apokaliptike. Pasazhi përmbyllës i librit thotë:
“Në përndjekjen përfundimtare të Kishës së Shenjtë Romake do të mbretërojë Pjetri Romaku, i cili do të kullosë kopenë e tij mes shumë mundimesh, pas së cilës qyteti me shtatë kodra do të shkatërrohet dhe Gjykatësi i tmerrshëm do t’i gjykojë njerëzit. Fundi.”
“Qyteti me shtatë kodra” interpretohet gjerësisht si Roma, dhe disa mendojnë se Pjetri Romaku do të marrë drejtimin e Kishës pas Papa Françeskut, duke e bërë këtë të fundit papën e fundit në histori.
Megjithatë, studiuesit modernë hedhin poshtë këto teori, duke argumentuar se “Profecia e Papëve” është një falsifikim i shekullit të 16-të, i krijuar për motive politike. Për më tepër, Bibla paralajmëron kundër përpjekjeve për të parashikuar ardhjen e dytë të Krishtit. Mateu 24:36 thotë qartë: “Por për atë ditë dhe atë orë askush nuk e di, as engjëjt e qiellit, as Biri, por vetëm Ati.”
Pra, për ata që besojnë tek profecitë, viti 2027 mund të jetë një vit i rëndësishëm – por ndoshta ende nuk është koha për të shënuar fundin në kalendar./k.k
