131 milionë lekë u janë vendosur në dispozicion 11 partive politike vetëm për fushatën zgjedhore parlamentare.
Nga torta e fondeve, Partia Socialiste e cila përfaqëson mazhorancën parlamentare, i është akorduar nga Komisioni Qëndror i Zgjedhjeve 65 milionë lekë.
Partia më e madhe opozitare, Partia Demokratike do të marrë rreth 45 milionë lekë.
Pason Partia e Lirisë me 9 milionë lekë, Partia Social Demokrate e Tom Doshit me 3 milionë lekë dhe
Parti të tjera parlamentare, kryetarët e të cilëve dolën deputet nga lista e sigurt e Partisë Demokratike, do të marrin nga 2 milionë e 600 mijë lekë në 896 mijë lekë.
E vetmja parti e cila nuk hyri dot në parlament, por do të marrë fonde është Nisma Thurje, po aq sa një parti e cila ka një deputet në parlament, pasi në 2021 kaloi pragun 1% të votave.
Këto janë të vetmet subjekte të cilat përfitojnë fonde, nga lista e gjatë me 53 parti që garojnë në zgjedhjet e 2025, përfshi partitë e reja të Lulzim Bashës apo Enkelejd Alibeajt, të cilat do u duhet të bëjnë fushatën me paratë e tyre.
Këtë ndarje, KQZ e ka bazuar tek rezultati përfundimtar i zgjedhjeve të 2021, dhe një votë për partitë që morën në ato zgjedhje, u vlen 85 lekë.
Në krahasim me atë vit, Komisioni Qëndror i Zgjedhjeve ka shkurtuar me 9 milionë lekë fondin e përgjithshëm të partive për fushatën, por këto nuk janë paratë e vetme të cilat do të përfitojnë.
Partitë anonime të Nard Ndokës, ballistëve e legalistëve po fërkojnë duart pasi deri në 2029, pa patur asnjë punë, do të fusin në xhep nga 8 milionë lekë në vit. / S,M
