Kryedemokrati Lulzim Basha ka zbritur ditën e sotme në terren për të parë situatën e bizneseve pas lehtësimit të masave.
Ai ka biseduar edhe me qytetarë të ndryshëm sa i përket përballimit të situatës nga koronavirusi.
Basha ka ngritur shqetësimin se qytetarë të shumtë nuk kanë marrë asnjë ndihmë financiare nga qeveria gjatë kohës së kaluar në karantinë, ndërsa bizneset sipas tij, po përballen me vështirësi të mëdha.
“Pjesa më e madhe e qytetarëve që takoj në Tiranë i kanë respektuar rregullat e higjienës dhe të distancimit social.
Megjithatë, shqetësim serioz mbetet situata ekonomike e rënduar nga pandemia e COVID-19.
Janë të shumtë qytetarët që nuk kanë marrë asnjë lekë ndihmë për kohën e kaluar mbyllur në shtëpi. Edhe bizneset përballen me vështirësi të mëdha. Mungesa e ndihmës rrezikon mbylljen e shumë prej tyre ndërsa të shumtë janë dhe ata që janë detyruar të heqin të punësuar nga listëpagesat.
Qeveria Rama i la pa ndihmë shumicën e qytetarëve dhe bizneseve. Rinisja e aktivitetit normal është shumë e vështirë për ta tashmë që veç faturave dhe taksave të larta, përballen me uljen e numrit të blerësve dhe ankthin për të ardhmen e pasigurt.
Xhepat e shqiptarëve janë shkundur nga pandemia ekonomike e qeverisë Rama. Asnjë formë propagande dhe cirku qeveritar nuk e fsheh dot pasigurinë dhe varfërinë e tejskajshme që po pllakos në familjet shqiptare”, shkruan Basha.
