Liderët europianë, Ukraina dhe Shtetet e Bashkuara bënë thirrje për një armëpushim 30-ditor pa kushte, duke filluar nga dita e hënë.
Keir Starmer i Britanisë së Madhe, Emmanuel Macron i Francës dhe Friedrich Merz i Gjermanisë u takuan me presidentin ukrainas Volodymyr Zelensky, të cilit i konfirmuan mbështetjen, dhe paralajmëruan sanksione të ashpra ndaj Rusisë, në rast se ajo nuk pranon armëpushimin.
Gjatë vizitës në Kiev, liderët europianë dhe Zelensky biseduan edhe me presidentin amerikan Donald Trump në një lidhje telefonike. Ata diskutuan përpjekjet për arritjen e paqes.
Duke mbajtur të njëjtin qëndrim, zyrtarët europianë, amerikanë dhe ata ukrainas ranë dakord armëpushimi të fillojë nga dita e hënë dhe kërkuan nga Rusia që ta pranojë.
Nga Kievi, një video konferencë u mbajt edhe me liderët e koalicionit të vullnetit që është formuar për të mbështetur Ukrainën. Liderët e Kanadasë, Italisë, Bashkimit Europian dhe NATO-s, mbështetën propozimin për ta filluar javën me një armëpushim.
Vizita shënoi herën e parë që udhëheqësit e katër vendeve udhëtojnë së bashku në Ukrainë, ndërsa Friedrich Merz bëri vizitën e tij të parë në Ukrainë si kancelari i ri i Gjermanisë.
Në një deklaratë të përbashkët, udhëheqësit e katër fuqive më të mëdha ushtarake të Evropës akuzuan Putinin se është bërë pengesë për arritjen e një paqeje të qëndrueshme.
Ata u zotuan të rrishin mbështetjen ushtarake për Ukrainën, derisa Rusia të bjerë dakord për një armëpushim./E.T
