SHBA-të kanë pranuar një aeroplan të destinuar për flotën e Air Force One nga Katari, një dhuratë që ka ngjallur kritika, përfshirë edhe nga disa prej mbështetësve më të mëdhenj të Presidentit Trump.
“Sekretari i Mbrojtjes ka pranuar një Boeing 747 nga Katari në përputhje me të gjitha rregullat dhe rregulloret federale”, tha zëdhënësi i Pentagonit, Sean Parnell, në një deklaratë të mërkurën, shkruan A2 CNN.
Aeroplani do të duhet të modifikohet përpara se të mund të përdoret si pjesë e Air Force One, mënyra zyrtare e transportit ajror të Presidentit.
Shtëpia e Bardhë këmbëngul se dhurata është e ligjshme, por njoftimi i transferimit një javë më parë shkaktoi polemika të mëdha.
Aeroplani është një dhuratë nga familja mbretërore e Katarit dhe vlerësohet të ketë një vlerë prej 400 milionë dollarësh (300 milionë paund). Shtëpia e Bardhë thotë se avioni i ri do të transferohet në bibliotekën presidenciale të Trump në fund të mandatit të tij.
Mund të duhen vite dhe miliona dollarë për t’u pajisur me sisteme shtesë sigurie dhe përmirësime të nevojshme për të transportuar Presidentin, shkruan A2 CNN.
Duke justifikuar transferimin një javë më parë, Trump tha: “Po na japin një dhuratë”. Presidenti ka thënë gjithashtu se do të ishte “budallallëk” të refuzonte aeroplanin.
Kushtetuta e SHBA-së ka një dispozitë të njohur si Klauzola e Pagave, e cila ndalon dhuratat për zyrtarët publikë nga qeveritë e huaja pa lejen e Kongresit. Transferimi nuk ka marrë miratimin e Kongresit.
Presidenti ka argumentuar se transferimi i aeroplanit është i ligjshëm sepse po i jepet departamentit të Mbrojtjes të SHBA-së dhe jo atij personalisht. Ai gjithashtu këmbënguli se nuk do ta përdorte atë pasi të largohej nga detyra.
Flota aktuale e Air Force One përfshin dy avionë 747-200 të cilët kanë qenë në përdorim që nga viti 1990, së bashku me disa avionë 757 më të vegjël. m.p.
