Një ditë pasi kryesocialisti Edi Rama shpalosi nevojën e të bërit ndryshe në nivelin e udhëheqjes së partisë, të grupit parlamentar dhe të qeverisë, nuk ka humbur kohë, duke nisur organizimin e një takim informal të kabinetit qeverisës.
Burime të gazetarit të Top Channel Muhamed Veliu, sugjerojnë se takimi mund të zhvillohet më 30 Maj në një qytet në jug të vendit. Paraprakisht mësohet se takimi do të fokusohet në analizën e çështjeve që lidhen me zgjedhjet e shkuara, paçka se PS fitoi 83 mandate. Sikurse do të kalojnë në skanerin e Ramës, performanca e kabinetit aktual qeverisës.
Një pjesë e rëndësishme e takimit do t’i kushtohet parlamentit të ri, nga ku Rama do të vjelë mendime për strukturën drejtuese të komisioneve parlamentare të drejtuara nga ligjvënësit socialist. Siç ka ndodhur pas çdo procesi zgjedhor parlamentar, nëse Rama do ta vijojë traditën, pritet mbajtja e një mbledhje e asamblesë kombëtare socialiste në dy javëshin e fundit të gushtit.
Ky besohet të jetë momenti kur kryeministri mund të shpallë kabinetin qeverisës “Rama 4”, e për t’u bërë gati për të marrë votëbesimin e parlamentit të ri, i cili mblidhet me 8 Shtator. m.p.
