Italia do të dërgojë në kampin e Gjadrit 30 emigrantë të tjerë, kur kanë kaluar më shumë se një muaj nga transferimi i fundit, që ka ndodhur më 11 prill. Mediat fqinje raportojnë se anija e marinës italiane “Spica” po lundron nga Brindisi për në portin e Shëngjinit. Anija “Spica” me rreth 30 emigrantë, u nis nga porti i Brindisit të martën në mëngjes me destinacion qendrën e paraburgimit të riatdhesimit në Gjadër.
Aktualisht kampi i Gjadrit strehon rreth 50 persona. Sipas Ministrisë së Brendshme italiane, 30 emigrantë janë riatdhesuar tashmë nga qendra shqiptare e pritjes.
Ndërkohë, vendimi i gjyqtarëve të Gjykatës Evropiane të Drejtësisë pritet në ditët në vijim. Ata janë thirrur të shqyrtojnë apelimet paraprake të paraqitura nga Gjykata e Romës, e cila deri më tani nuk e ka njohur legjitimitetin e arrestimeve të urdhëruara kundër emigrantëve të shpëtuar në Mesdhe dhe të transferuar në anën tjetër të Adriatikut, sepse ata vijnë nga vende që qeveria italiane i konsideron të sigurta, në veçanti Egjipti dhe Bangladeshi.
Ministri i Brendshëm, Matteo Piantedosi sakaq ka sqaruar se në Gjadër janë transferuar vetëm njerëzit me rrezik të veçantë.
“Nuk është e vërtetë që ne dërgojmë atje emigrantë që janë fajtorë vetëm për faktin se janë ilegalisht në Itali, nuk është kështu. Kemi riatdhesuar njerëz që po liroheshin nga burgu për disa vite për krime të rënda, përfshirë përdhunim, pornografi me fëmijë e kështu me radhë”, shpjegoi Piantedosi teksa komentonte transferimin e katërt të të huajve të paligjshëm në territorin italian në qendrën shqiptare për të pritur dëbimin.
“Pra, ne kufizojmë vetëm njerëzit që përbëjnë një rrezik shoqëror për këto qendra. Qendra do të sigurojë një funksionalitet shumë të rëndësishëm dhe po presim, në muajt në vijim, vendimin e Gjykatës Evropiane të Drejtësisë dhe rregullat evropiane për këtë çështje në qershor 2026, për të qenë në gjendje të përdorim edhe pjesën tjetër të strukturës”, shtoi ministri i Brendshëm italian.
