Është një gjë pozitive që disa aktorë të opozitës po flasin për nevojën e bashkimit të saj. Ky është në të vërtetë thelbi i debatit brenda opozitës, pasi është dhe arsyeja kryesore pse ajo u dërrmua si asnjëherë më parë në këto zgjedhje. Humbja dërrmuese u shkaktua nga fakti që nuk ishin të bashkuar, por garuan me pesë sigla të ndara.
Berisha vetë e pranoi sot se arsyeja e humbjes është përçarja, ndaj dhe deklaroi se është dakord për bashkim.
Por problemi nis pikërisht këtu. Berisha dhe pjesët e tjera të opozitës kanë kuptime krejt të ndryshme për fjalën “bashkim”.
Berisha quan “bashkim” atë kur të gjithë i bashkohen atij. Çdo formë tjetër bashkimi e konsideron përçarje.
Nga ana tjetër, Agron Shehaj ka propozuar që opozita të bashkohet rreth një figure tjetër, që nuk është e konsumuar politikisht. Nuk ka thënë që s’duhet të jetë figurë politike, por vetëm që të mos jetë e konsumuar. Pra, pak a shumë e kundërta e Berishës.
Kjo është arsyeja pse Berisha i është kundërvënë prerë këtij propozimi.
Berisha është gati të bëjë gjithçka që çdo fraksion opozitar t’i bashkohet partisë së tij, por vetëm rreth një kandidati që e cakton ai vetë. Ndërkohë, pjesa tjetër e opozitës kërkon pikërisht të kundërtën: të shkëputet nga imazhi i Berishës.
Një opozitë e tëra e bashkuar në rresht pas Berishës është e sigurt që do marrë edhe më pak vota se sot. Siç e tregoi bashkimi me ish-LSI: të dy bashkë u bënë më të vegjël. Arsyeja? Berisha dhe Meta. Nëse këtij pellgu të ndenjur i shtohen dhe parti të tjera, ai vetëm sa bëhet më i vogël.
E vetmja mundësi reale për rritje e ka opozita jashtë Berishës — nëse ajo bashkohet dhe gjunjëzon PD-në që t’i bashkohet pa figurën e tij. Por kjo nuk ndodh. Deberishizimi i PD-së është një proces që nuk ka për të ndodhur më. As pas vdekjes së tij. E vetmja gjë që mund të lindë në opozitë është një opozitë e re, që nuk ka lidhje me Berishën.
Për këtë arsye, bashkimi me Berishën nuk mund të ndodhë, pasi ai të do ose në rresht pas tij, ose përballë. Ndaj, debati për “shanset e bashkimit” është humbje kohe./kb
