Jeff Bezos, themeluesi i Amazon-it dhe një nga njerëzit më të pasur në botë, është detyruar të zhvendosë ceremoninë e tij të dasmës nga zemra historike e Venecias, pas një vale protestash nga banorët lokalë që e akuzojnë se po e “pushton” qytetin.
Fillimisht ishte planifikuar që festa e dasmës me Lauren Sanchez të mbahej në Scuola Grande della Misericordia, një sallë madhështore e shekullit të 16-të, por protestat e ashpra nga aktivistët vendas bënë që vendi të ndryshonte. Protestuesit kërcënuan se do të hidhnin kamerdare në formë krokodilësh të mëdhenj në kanalet e qytetit për të penguar ardhjen e të ftuarve me gondola dhe taksi ujore.
“Është një fitore e madhe për ne”, deklaroi Tommaso Cacciari nga grupi protestues “No Space for Bezos”. Ai shtoi se edhe pse dasma do të zhvendoset, protestat do të vazhdojnë në qendër të qytetit.
Ceremonia është transferuar në Arsenale, një kompleks historik i rrethuar me mure dhe shumë më i lehtë për t’u siguruar. Ky ndryshim u ndikua jo vetëm nga presioni publik, por edhe nga shqetësimet e rritura për sigurinë, për shkak të situatës ndërkombëtare dhe pranisë së anëtarëve të familjes Trump, që mund të jenë objektiv sulmesh.
Ndërkohë, dhjetëra avionë privatë pritet të mbërrijnë në aeroportin Marco Polo të Venecias, duke sjellë mysafirë nga e gjithë bota, përfshirë Kim Kardashian, Oprah Winfrey, Lady Gaga, Bill Gates dhe Elton John.
Megjithatë, qyteti është ndarë mes dy qasjeve: nga njëra anë, aktivistët që denoncojnë shndërrimin e Venecias në skenë të eventeve miliardere duke larguar vendasit; dhe nga ana tjetër, grupi “Yes Venice Can”, që përfaqëson hotelierët dhe bizneset vendase, duke e mirëpritur Bezosin dhe milionat që ai sjell me vete.
Greenpeace dhe grupi britanik “Everyone Hates Elon” organizuan një protestë në Sheshin e Shën Markut, me një pankartë ku shkruhej: “Nëse mund të marrësh Venecian me qira për dasmën tënde, mund të paguash edhe më shumë taksa”.
Protestuesit theksojnë se nuk është çështje personale, por një sistem i prishur ku miliarderët shmangin përgjegjësitë, ndërsa qytetarët e zakonshëm mbajnë barrën./e.t
