Reforma zgjedhore mbetet “peng” i çështjes së Teatrit, opozita nuk ka më besim tek një marrëveshje politike që ishte në prag
Nga Blerina Gjoka
Reforma zgjedhore, si një ndër kushtet më të forta të negociatave me Bashkimin Evropian, tashmë mbetet peng i çështjes së shembjes së Teatrit Kombëtar. Edhe pse një marrëveshje e mundshme politike mes palëve ishte në prag, opozita ka shfaqur mosbesim tek mazhoranca dhe kërkon ta përdorë çështjen e teatrit për t’i imponuar faktorit ndërkombëtar një kush të ri në listën e gjatë të kushteve për fillimin e negociatave të anëtarësimit.
Opozita ka deklaruar se me aktin e shembjes së teatrit kryeministri ka hedhur në erë edhe besimin te zgjedhjet. Kreu i opozitës, Lulzim Basha, tha mbrëmë nga sheshi i protestës që vijon pas shembjes së teatrit, se Partia Demokratike dhe opozita do të ndërmarrin hapa të mëtejshëm për t’u dhënë shqiptarëve lirinë e votës. Basha foli edhe për Reformën Zgjedhore, duke deklaruar se Rama minoi besimin me atë që bëri në 17 maj.
“Ne kemi bashkuar sot të gjitha forcat tona në gjithë vendin, në një projekt ndryshimi i cili merr jetë me votën e shqiptarëve. Ndryshimi në Shqipëri është i paevitueshëm. Në ditët në vijim PD-ja dhe opozita do të përvijojnë hapat e mëtejshëm me qëllim që synimi i kahershëm për t’u dhënë shqiptarëve lirinë e votës, pa të cilën s’mund të ketë zhvillim, punësim, as Evropë, të realizohet një orë e më parë, për të shporrur me votë një qeverinë uzurpatore të institucioneve, një qeveri hajdute. 17 maji të jetë krimi i fundit i kësaj qeverie. Për Reformën zgjedhore, me atë që ndodhi në 17 maj, PS-ja dhe Edi Rama kanë hedhur në erë besimin te zgjedhjet, opozita s’mund të jetë fasadë. Ne do të jemi gati për ndryshim sistemi dhe lista të hapura, për kufizim të mandatit të deputetit dhe kryeministrit, por s’do ketë besim, sa kohë do të jetë Edi Rama”, u shpreh Basha.
Edhe më herët kryedemokrati Lulzim Basha ka bërë të qartë se opozita tashmë do të vendosë kushte të reja për rikthimin e saj në tryezën e Këshillit Politik, tryezë që nisi në janar të këtij viti dhe u duk se e qetësoi shumë situatën e tensionuar politike që vijon prej më shumë se një viti.
Por Basha thekson se “sa kohë mazhoranca nuk ka pranuar propozimet e opozitës, kjo e fundit nuk mund dhe nuk do të të jetë fasadë për të”.
Deklarata e tij është paraprirë nga një vendim i opozitës për të ngrirë negociatat në Këshillin Politik, të ngritur për realizimin e reformës zgjedhore.
Ky këshill kishte planifikuar me konsensus mes palëve që të arrihej një marrëveshje deri në fund të majit për të gjitha ndryshimet që do të kryheshin në kodin zgjedhor, për realizimin e zgjedhjeve të reja parlamentare sa më të lira dhe të ndershme.
PS kërkesë zyrtare opozitës: Mos humbni më kohë, rikthehuni në tryezë
Bashkëkryetarët e Komisionit për reformën zgjedhore, Damian Gjiknuri dhe Rudina Hajdari, kanë ftuar opozitën të rikthehet në tryezën e këshillit politik për reformën zgjedhore. Në letër propozohet që mbledhjet e radhës të mbahen në datat 21 dhe 22 maj dhe Gjiknuri me Hajdarin bëjnë apel që të mos humbet më kohë, pasi 31 maji nuk është larg.
“Nisur nga mungesa e paparashikuar e përfaqësuesve tuaj, (opozitës jashtëparlamentare), në mbledhjen e dakordësuar të datës 18 maj 2020, si dhe nga nevoja urgjente e adresimit të një numri çështjesh që kanë mbetur pezull për diskutim dhe miratim nga grupi negociues politik, propozoj thirrjen e mbledhjes së radhës ditën e enjte ose të premte (21/ 22 Maj, ora 10.00 AM ), në të njëjtën vend ku kemi zhvilluar dhe mbledhjet e fundit, në Pallatin e Kongreseve”,- shkruajnë në letrën e tyre Hajdari dhe Gjiknuri.
Ata u kërkojnë kolegëve të tyre të PD-së dhe LSI-së, Oerd Bylykbashi dhe Petrit Vasili, që të vijohet me miratimin e ndryshimeve ku është gjetur më parë dakordësia dhe vijimin e diskutimit me pika të tjera të rëndësishme, siç është ajo e financimit të fushatës zgjedhore.
“Grupi i ekspertëve teknikë, përfshirë dhe përfaqësuesit tuaj, kanë përgatitur propozime të cilat kërkojnë miratimin tonë për pikat që akoma nuk është gjetur dakordësi. Puna e grupit teknik është realizuar sipas metodologjisë së rënë dakord në grupin negociator, si dhe në të janë reflektuar edhe opinionet me shkrim të ekspertëve të ODIHR-it dhe Këshillit të Evropës”, – shkruajnë anëtarët e këshillit politik për reformën.
Sipas Hajdarit dhe Gjiknurit, nuk duhet humbur kohë, pasi data 31 maj, një datë e propozuar nga opozita, si afati për përmbushjen e objektivit të reformës zgjedhore me dakordësi, po afron dhe mbetet shumë pak kohë në dispozicion për të adresuar numrin e çështjeve të mprehta që ne kemi mbi tavolinën e negociatave./Fjala.al
