Zëvndësministri i Infrastrukturës dhe Energjisë, inxhinier Artan Shkreli, por edhe një studiues i njohur, ka sjellë kujtimet e tij për një vend që është diskutuar shumë ditët e fundit. Bëhet fjalë për kampin famëkeq të Qafës së Barit në Pukë ku ishin të burgosurit politikë dhe që është i njohur për revoltën e 22 majit 1984.
Shkreli sjell një histori personale të vitit 1988 kur ka qendruar një javë në një kantier si inxhinier dhe që pa nga afër të burgosurit e kampit të Qafës së Barit.
Në statusin e tij në Facebook, Shkreli jep detaje për të burgosurit që, sipas tij, kishin një përqendrim neurotik dhe atmosferën atje të cilat ai i quan të gjitha gri dhe duke e shoqëruar këtë edhe me fotografi.
Ja statusi i Artan Shkrelit:
“K U R . L I R I A . Q E . E . P Ë R H I M T Ë
…
Fantazmat e Qafë-Barit i hasa në një kantjer pallati në Pukën e 1988-ës. Zëvendësoja për një javë në zbatim mikun tim Tur Zhebo, drejtor kantjeri fare i ri. Hera e parë që shihja të burgosur nga afër… ishin të heshtur e gjithnjë të përqëndruar në atë që bënin; një përqëndrim i pazakontë neurotik.
Nuk kam fjalë sot të përshkruaj sjelljen e tyre ato ditë që ndiqja punimet. Policët nuk linin të fisje me ta, vetëm përmes një tip brigadieri.
Ata të burgosur ishin të gjithë gri… edhe më gri se pejsazhi i Pukës atë dimër; krejt gri, flokët, fytyrat, teshat… vetëm sytë u shkëlqenin shpues majë siluetave të përhimta. Ndofta dikur do shkruaj per ta”.
