Teatri Kombëtar i ndërtuar në fund të viteve tridhjetë nga arkitekti italian Giulio Berte ishte një shembull i arkitekturës fashiste, që u bë një qendër kulturore dhe simbol i kryeqytetit shqiptar.
Teatri Kombëtar i Tiranës nuk ekziston më, fadromat e inspektoratit për mbrojtjen e territorit të dërguar nga kryeministri socialist, Edi Rama, kanë fshirë nga zemra e qytetit godinën e ndërtuar në fund të viteve 1930 nga arkitekti italian Giulio Berte (i njëjti që nënshkroi projektin për Ponte Flaminio në Romë). Një sulm i bërë në agim të dielën e 17 majit, ndërsa dhjetëra qytetarë të mbledhur me Aleancën për Mbrojtjen e Teatrit ishin në ndërtesë, disa hapa larg nga sheshi Skënderbej, rrëzuan godinën që solli një sërë protestash në më shumë se dy vite raporton La Repubblika.
Nga ana tjetër e Adriatikut, disa kilometra nga brigjet e Pulias, qytetarë dhe opozitarë ndaj qeverisë Rama flasin për “provën e kthesës autoritare të Kryeministrit”. Dikush tjetër për atë të “diktaturës”. Edhe Presidenti i Republikës, Ilir Meta, në një postim në ‘Facebook’ e ka quajtur këtë si “shkatërrimin përfundimtar të çdo iluzioni të ekzistencës së shtetit të së drejtës në Shqipëri”. Monika Kryemadhi, drejtuese e Lëvizjes Socialiste për Integrim edhe zonja e parë, u ndalua nga policia së bashku me rreth gjashtëdhjetë qytetarë, përfshirë regjisorin dhe producentin Robert Budina, i cili u lëshua pas 15 orësh.
“Ne ishim në një dhomë në katin e tretë kur policia erdhi dhe na sulmoi duke përdorur edhe spray me piper. Më drejtuan një kallashnikov para se të më çonin në stacionin e policisë,” tha artisti 56 vjeç për La Repubblica. “Rama dëshiron të na etiketojë si barbarë që kundërshtojnë modernizimin e vendit. Dhe ai thotë se ajo ndërtesë kishte probleme statike”, shton regjisori.
“E rreme. Struktura mund të rinovohej, përderisa i rezistoi tërmetit të nëntorit 2019”,-thotë Adi Krasta, gazetar 55-vjeçar i televizionit, profesor për komunikimin në Universitetin e Tiranës dhe Prishtinës, kryeqyteti i Kosovës. Ai është një zë i padëshiruar për kryeministrin (“më nxori jashtë nga tre emisione”, kujton profesionisti).
Akuza është se sipërfaqja prej mbi pesë mijë metrash katrorë, e cila i kaloi Bashkisë së Tiranës me një dispozitë të qeverisë Rama në 8 maj, do shndërrohet në hapësirë për të ndërtuar kulla, përveç një teatri më modern.k.t/Fjala.al/
