Policia italiane ka arrestuar një 32-vjeçar shqiptar që ishte shpallur në kërkim prej kohësh. Shqiptari u vu në pranga në një hotel luksoz, të cilin e kishte rezervuar për festat e fundvitit.
Mediet vendase raportojnë se shqiptari me inicialet A.A u arrestua mëngjesin e djeshëm në një hotel me pesë yje në Forte dei Marmi.
32-vjeçari kishte dorëzuar dokumente false në recepsionin e hotelit, por u zbulua pasi fotoja në dokument ishte shumë e ndryshme nga personi fizik dhe kjo bëri që punonjësit të lajmëronin policinë.
Shqiptari ishte shpallur në kërkim për trafik dhe shpërndarje droge, madje ishte emër i njohur, pasi ishte dëbuar më parë nga Italia.
Zbulimi i 32-vjeçarit u bë fare lehtë, mjaftoi një kontroll i shenjave të gishtave për ta kuptuar se ishte ai që kërkohej nga policia.
Ky shtetas ishte dënuar edhe më parë në moshën 19 vjeçare për krime të rënda, rrëmbim me qëllim të zhvatjen e vazhdueshme, dëmtim personal, mbajtje armësh, ndërkohë më pas ishte bërë pjesë e një rrjeti trafiku droge./Fjala.al/
