Futbollisti i Bylisit që ka rezultuar pozitiv me koronavirus ndodhet tashmë i izoluar në Fier, ndërsa i gjithë ekipi do t’i nënshtrohet ditën e sotme testeve.
Ndonëse emri i lojtarit nuk është bërë publik, dyshohet se i prekur nga Covid-19 mund të jetë Eridon Qardaku, që është i vetmi futbollist nga Shkodra, vendi ku u tha se është infektuar.
Ndërsa pritet që pas 12 orësh të dalin rezultatet e testeve të ekipit të Bylisit, tashmë të gjithë ngrenë pyetjen se çfarë do të bëhet me rikthimin e Superligës, që ishte planifikuar për ditën e nesërme, 3 qershor 2020.
Bazuar në faqen 11 të protokollit sanitar që Federata Shqiptare e Futbollit ka dorëzuar te Ministria e Shëndetësisë për marrjen e dritës jeshile për rikthimin në fushë, lojtari i prekur do të detyrohet të karantinohet për 14 larg çdo personi të mundshëm, madje edhe familjarëve të tij.
Ndërsa nëse ekipi do të ketë në dispozicion mjaftueshëm futbollistë për t’u rikthyer në fushë, atëherë kampionati do të vazhdojë.
Megjithatë përgjigja përfundimtare pritet që të jepet ditën e nesërme, pas daljes së rezultateve të gjithë skuadrës./Fjala.al/Katerina Tafa/
