Kreu i PD-së, Lulzim Basha ka reaguar në lidhje me postimin e kryeministrit Edi Rama i cili bëri me dije se vendi ynë është vlerësuar pozitivisht nga tregjet e kapitaleve pas daljes në Eurobond në kërkim të financimit të ekonomisë.
Në një reagim në “Twitter”, Basha shkruan se kreu i qeverisë mburret se merr borxh të ri dhe shton se tashmë qeveria po iu vendos qytetarëve një barrë të re pas detyrimeve të prapambetura dhe koncensioneve abuzive.
“Shqipëria e zhytur në borxhe kurse KM mburret se merr borxh të ri!!! Me nivel borxhi 74%, me detyrime të prapambetura 600 mln euro, me koncesione abuzive 2,2 mld euro dhe me krizën më të thellë ekonomike me rënie 9%, sot mburret se po i shton cdo shqiptari edhe një barrë të re!
Ka ardhur koha për ta larguar RAMAVIRUSIN që e zhyti ekonominë në krizën më të thellë, që mbylli bizneset, shpunësoi e largoi shqiptarët. Ka ardhur koha për të parë përpara dhe për ta bërë Shqipërinë vend normal e të zhvilluar”, shkruan Basha.
650 milionë euro është vlera që vendi ynë ka kërkuar në tregjet ndërkombëtare në formën e eurobondit. Nga kjo vlerë 250 milionë euro do të shkojë për të financuar Eurobondin e marrë në vitin 2015, që ishte në vlerën e 450 milionë euro me normë interesi 5.75% dhe që i mbaron afati i shlyerjes në 12 nëntor 2020./E.B./Fjala.al
