Kryeministri Edi Rama i është kundërpërgjigjur ish-deputetes së PD-së Jorida Tabaku pas akuzave të kësaj të fundit për të se kur është në vështirësi gënjen shqiptarët dhe sulmon personalisht këdo që iu tregon shqiptarëve të vërtetën dhe e quajti një gënjeshtar të paskrupullt.
Kreu i qeverisë i bën thirrje për vetëpërmbajtje, pasi sipas tij gjuha e akuzave dhe fyerjeve nuk është as argument, as shembull qytetarie. Rama i thekson edhe një herë opozitës se marrja e 650 milionë eurove në formë eurobondi ishte një sukses i qeverisë.
“Përmbahu zonja Tabaku, përmbahu sepse gjuha e akuzave dhe fyerjeve nuk është as argument, as shembull qytetarie në një shoqëri që ka nevojë për t’u pastruar në gjak e në mendje nga helmi i fjalëve të rënda, të cilat prej vitesh janë bërë buka dhe djathi i tregut të politikës… Doni s’doni ju Eurobondi ishte një sukses kuptimplotë, përmbajtja e të cilit është pasqyrë e qartë e zbrazëtisë së propagandës politike-mediatike kundër qeverisë dhe në fakt, kundër vetë Shqipërisë që ju e tregoni përditë si ferrin mbi tokë! Shqipëria dje triumfoi, doni s’doni.” shkruan Rama./En.Br./Fjala.al
