E cilësuan një “Shaq-attack” kur firmosi me Liverpool, një lojë fjalësh me emrin e tij që i përngjante me sulmin e papritur të një peshkaqeni, por në zonën kundërshtare në futbolli. Tani, Xherdan Shaqiri po vuan për të gjetur edhe pak admirues në kampin e Reds, dhe kjo verë do të jetë e fundit te kampionët ende të pashpallur të Anglisë.
“Liverpool Echo” insiston se agjenti i Shaqirit ka marrë lejen e klubit për të negociuar me ekipe të tjera. Anësori me prejardhje nga Kosova që luan me përfaqësuesen zvicerane, ka kaluar një sezon të vështirë në ‘Anfield Road’, duke u përballur me shumë lëndime, e gjithashtu duke mos qenë i preferuari i trajnerit Jurgen Klopp, edhe kur ishte i gatshëm për të dhënë kontributin në fushë.
Ndeshja e fundit që Shaqiri është aktivizuar te Liverpool këtë sezon, është ajo kundër Tottenham, në janar të këtij viti. Galatasaray dhe Sevilla janë të interesuara për 28 vjeçarin që tani kushton pak, dhe është i sakrifikueshëm, falë alternativave të mëdha në ofensivën e Liverpool.
