Gjuha e minoriteteteve, ka ngjalluar jo pak diskutime edhe në rrjetet sociale. Me anë të një postimi Profesor Përparim Kabo shkruan se kjo nismë e re ligjore është gabimi i radhës në këtë tematikë.
Kabo, shkruan për vendimmarrësit se do të ketë një ndëshkim të rëndë nga historia dhe se ai kishte provuar që të komunikonte dhe t’i bindte për të mos shkuar më tej me këtë nismë.
Sakaq Kabo shkruan se qëllimin për të avancuar në procesin e integrimit në BE, politikanët vendimmarrës po pranojnë të njohin minoritete greke edhe në Mallakastër apo edhe në veri të vendit.
Kuota 20% duket se është një gabim i rëndë dhe në asnjë moment nuk ka qenë pjesë e kushteve të vendosura nga Brukseli në procesin e negociatave me BE-në, shkruan Kabo në postimin e tij në rrjetin social.
Postimi i plotë
Ju gabuat kur miratuat një ligj për pakicat në Republikën e Shqipërisë, gabuat sepse nuk iu referuat dokumentit bazik të Këshillit të Europës, Konventës Kuadër për Pakicat. Në të përcaktohet se ç’është pakica kombëtare, çfarë janë pakicat etnokulturore, ç’është zona e pakicës dhe pse nuk ka pakica kombëtare pa zonë pakice.
Në dokument shpjegohet me argument se zonë e pakicës është ajo hapësirë e banuar ku pakica në raport me autoktonët është shumicë demografike dhe se zona nuk zhvendoset nëse personat lëvizin në brendësi të territorit. Ju gabuat sepse nuk dëgjuat dhe nuk lexuat se zona të pakicave ka vetëm në hapësirat ndërkufitare. Ju u nxituat dhe nuk më dëgjuat edhe kur ju shpura fjalë zyrtarisht dhe fola me ju që drejtoni Parlamentin, dhe ju thashë mos, mos se do shihni se ç’do t’u vijë pas.
Ju më thatë ka hyrë për procedurë dhe nuk e ndalojmë dot… Historia do t’ju ndëshkojë, ju thashë. Nuk kaluan shumë kohë dhe ja, tani, një nga 15 pikat e BE-së s’është për ligjin e pakicave. Ju krijuat një situatë të paqenë se e shputë në 20% numrin e tyre, kur ato kurrë nuk kanë qenë më shumë se 2.9-3.1%.
Ju nuk dini se ç‘janë pakicat etnokulturore si bashkësi etnike para krijimit të kombit dhe kur ai krijohet ato shkrihen në kombin e autoktonëve, duke mbajtur disa veçori siç është gjuha dhe besimi fetar. Ju gabuat se lëvizjen e lirë edhe të individëve të pakicave e shoqëruat me njohjen si pakicë kombëtare edhe në hapësira ku nuk ka zonë pakicë dhe tani rrihni ujë në hava duke bërë gabime të reja, që t’ju pranojnë në BE dhe nxirrni pakica greke dhe në Mallakastër apo deri në veri… Jo, shteti nuk drejtohet pa shkencë, dhe kujdes!
Ju kanë vënë përpara shtete që as e njohin dhe as e kanë firmosur Konventën Kuadër të Këshillit të Evropës për pakicat. Injoranca nuk është argument, thoshin latinët. Para disa vitesh, kur Pribe kryesonte grupin e BE-së për marrëveshjen e stabilizim asocimit, u ngrit kjo çështje. Zonja Ermelinda Meksi më thirri dhe biseduam gjatë, duke sqaruar gjithçka dhe duke sqaruar dhe Brukselin.
Madje, shpjegimi im u publikua dhe në revistën që botonte asokohe Ministria e Integrimit me titull “Problemet e mëdha të pakicave të vogla”. Ju tani po i bëni pakicat etnokulturore si pakica kombëtare dhe pse jo 20% të popullit shqiptar i nxorët nga kombe të huaja… Ata që janë shpallur bullgarë dhe rumunë kanë marrë edhe pasaportat e këtyre vende dhe ia kanë mbathur në BE e deri në Angli… Ndaj, kujdes! Nuk janë çështje kaq të thjeshta, po përmbysni historinë me profanitë tuaja…
Bo.Ba/fjala.al
