“Arrest me burg” ka caktuar gjykata e Laçit për dy mjekët që do operonin në një spital privat Eduart Lamajn, 30-vjeçarin i cili akuzohet si autori i atentatit të dyfishtë ndodhur rreth një muaj më parë në Laç.
Togat e zeza të Kurbinit kanë lënë në burg mjekët Besim Lama dhe Viktor Marku, të paktën deri në përfundim të hetimeve. Gjykata pranoi kërkesën e prokurorisë, e cila ka ngritur ndaj tyre akuzën për “Moskallëzim krimi” dhe “Veprime që pengojnë zbulimin e së vërtetës”.
Gjatë seancës së zhvilluar me dyer të mbyllura dy mjekët kanë mohuar akuzat. Nëpërmjet avokatit të tyre ata kanë pretenduar se nuk e njihnin personat dhe se ata thjeshtë kanë kryer detyrën e tyre si mjekë.
Mjekët Marku dhe Lama do të operonin autorin në këmbë Eduart Lamajn në një spital privat pa e referuar ngjarjen në polici. Ata u zbuluan pasi agjentë të policisë së Laçit dhe të Tiranës prej gati dy javësh mbanin në vëzhgim familjarët e Lamajt, duke monitoruar të gjitha lëvizjet e tyre.
Agjentët gjatë vëzhgimeve zbuluan se i riu për shkak të plagës që mori ditën e ngjarjes shkonte paraqitej vazhdimisht në një klinikë private në kryeqytet për të mjekuar plagën, të cilën e kishte të infektuar nga plumbi që kishte në këmbë.
Mbrëmjen e së shtunës Lamaj është dërguar në spitalin privat “Amavita”, që ndodhet pranë Qytet Studentit, për të kryer një ndërhyrje kirurgjikale, pa e referuar ngjarjen në polici. Familjarët e 30-vjeçarit mësohet se u kishin paguar 10 mijë euro dy mjekëve. Ndërkohë që të gjitha veprimet hetimore janë koordinuar nga Departamenti i Policisë Kriminale.
la.mi/Fjala.al
