Kryeministri i Kosovës, Avdullah Hoti ditën e sotme do të vizitojë zyrtarisht për herë të parë Shqipërinë, që pas marrjes së detyrës së tij.
Kreu i qeverisë së Kosovës ka planifikuar të zhvillojë disa takime me krerët më të lartë të politikës shqiptare.
Hoti fillimisht do të pritet nga kryeministri Edi Rama në Pallatin e Brigadave në ora 10:00 dhe pas takimit do të mbajnë një konferencë të përbashkët për shtyp.
Në orën 13:00 do të shkojë në Presidencë për t’u takuar me kreun e shtetit të Shqipërisë, Ilir Meta. Ndërsa një orë më pas, kryeministri i Kosovës do të takohet me kryetarin e Kuvendit të Shqipërisë, Gramoz Ruçi, në zyrën e këtij të fundit në orën 14:00.
Në ora 14:45 është parashikuar për të takuar kryebashkiakun e Tiranës, Erion Veliaj në Bashkinë e Tiranës. Ndërsa në fund të ditës, Avdullah Hoti do të takojë edhe kryetarin e Partisë Demokratike, Lulzim Basha në selinë e partisë në ora 15:30.
/En.Br./Fjala.al
