Jo të gjithë liderët e vendeve kryesore të botës zgjedhin që momentin e ndërrimit të viteve ta kalojnë me çdo kusht në vendin e tyre. Ka nga ata që festojnë me popullin dhe i qëndrojnë besnik si atdheut dhe familjes, por ka edhe nga ata tipa udhëheqësish snobistë, që duan pak më shumë relaks, dhe zgjedhin skajet e botës për këtë.
I tillë është edhe kryeministri ekstravagant anglez, Boris Xhonson, që bashkë me të dashurën e tij, Keri Simonds, kanë mbërritur te vila e tyre në Karaibe, e cila kushton 23 mijë euro për një fundjavë.
Vila me gjashtë dhoma, ku kryeministri do të çlodhet pas fushatës, ndodhet në majë të një kodre dhe ka pamje fantastike nga ishulli dhe oqeani. Ky ishull ekskluziv, i quajtur Mustik, ndodhet në arkipelagun e Sent Vinsent dhe Grenadines dhe njihet për rërën e bardhë e detin e mrekullueshëm.
Por ajo që do të shqetësojë më shumë britanikët dhe që do të përhapë më tepër polemika, nuk është e drejta e një lideri për të marrë ca ditë pushime dhe për të bërë një udhëtim romantik, sidomos në ditët e festave të fundvitit, por kostoja e lartë e këtyre pushimeve dhe nga se do të mbulohen ato.
Taksapaguesit britanikë, të cilët shquhen për reagimin dhe ndjeshmërinë e lartë kur vjen fjala për paratë e tyre të dhëna shtetit, duket se edhe këtë herë do të krijojnë polemika mbi këto lëvizje të kryeministrit të shumë-debatuar Xhonson./Fjala.al/
