Vetëm pak orë na ndajnë nga ndërrimi i viteve dhe në çdo kryeqytet të botës janë duke u bërë përgatitjet e fundit për të pritur Vitin e Ri.
Ashtu siç ndodh gjithmonë sheshet kryesore të qyteteve e kryeqyteteve zbukurohen e përshtaten me atmosferën festive.
Dy kryeqytetet tona, Tirana dhe Prishtina, prej disa javësh kanë veshur ngjyrat e festave dhe kanë pritur qytetarët që t’u bashkohen. Mirëpo të presësh ndërrimin e viteve në shesh së bashku me mijëra bashkëkombas të tu është shumë e bukur.
Në sheshin kryesor të Prishtinës, “Gjergj Kastriot Skënderbeu”, është vendosur një slogan që fton të gjithë qytetarët, që ndodhen në kryeqytetin e Kosovës në natën e ndërrimeve të viteve, që të bashkohen atje.
“Prite n’shesh”, shkruhet në hyrje të sheshit, ku është vendosur edhe numri 2020 që nënkupton vitin që po vjen. Megjithatë atmosfera festive ndihet në të gjithë Prishtinën me dritat dhe zbukurimet e vendosur, por sikur të mos mjaftonin këto elemente flokët para të dëborës e bëjnë kreqytetin e Kosovës të duket akoma më magjik në këtë fundvit./Fjala.al/ Përgatiti: Katerina Tafa/
