Partia Demokratike ka vazhduar angazhimin e saj politik edhe një ditë para Vitit të Ri, pasi ka dërguar të deleguarit e saj në Thumanë në mbështetje e të prekurve ndaj tërmetit.
Sekretari i Përgjithshëm i PD, Gazment Bardhi dhe ish-deputetët Albana Vokshi, Lindita Metaliaj dhe Gent Strazimiri, u takuan me përfaqësues të mbi 100 familjeve të Thumanës, të cilët kanë paralajmëruar nisjen e një greve urie.
Kjo grevë pritet të zhvillohet në kuadër të kundërshtimit të vendimit të qeverisë se banorët duhet të dalin nga hotelet deri në 3 janar dhe për të gjetur shtëpi me qira.
Gazment Bardhi garantoi banorët e revoltuar me vendimin e qeverisë për t’i nxjerrë jashtë hoteleve pa siguruar shumën minimale për një shtëpi me qira, se opozita do të jetë zëri i tyre.
“Edhe unë në varfëri jam rritur, njësoj si fëmijët tuaj, prindërit aq mundësi sa kanë pasur, aq na kanë ofruar, por kemi mbijetuar. Ajo që kërkojnë fëmijët tuaj nuk janë lodrat, është shtëpia. Dy gjëra kanë të rëndësishme njeriu në jetë: jetën dhe falë Zotit jemi gjallë, dhe pronën, banesën. Tërmeti real për ju fillon tani. Ju garantoj sa herë të keni nevojë që zëri juaj të dëgjohet, shqetësimet tuaja të dëgjohen ne do të jemi përkrah jush. Ju në rrugë të madhe nuk mund të nxirreni dot.”- u shpreh zoti Bardhi./Fjala.al
