Deputetja e Partisë Socialiste, Blerina Gjylameti e deklaroi se marrëveshja mes opozitës jashtëparlamentare dhe maxhorancës për reformën zgjedhore bëri që palët të uleshin në një tryezë për të gjetur gjuhën e përbashkët, falë edhe ndërkombëtarëve.
nga paneli i “Real Story,” Gjylameti tha se marrëveshja në fjalë nuk parashikon që të krijohet një tjetër komision i veçantë, por do të vijohet me Komisionin e Reformës Zgjedhore, ndërsa shtoi se nëse nuk arrihet të ketë konsensus, do t’i kërkohet mendim OSBE/ODHIR-it.
“Do jepet garanci për atë çka do ndodh. Aty nuk ka asnjë komision të veçantë, por është komisioni i Reformës Zgjedhore, dhe do të jetë konsensual. Në Shqipëri nuk kemi pasur asnjë kod zgjedhor pa pasur konsensus. Në komisionin e Reformës zgjedhore ka një punë të bërë prej shumë kohësh. Por ne nuk kemi amenduar asnjë vendim, për të arritur një konsensus me opozitën jashtëparlamentare. Nëse s’do të kemi marrëveshje mes palëve, ajo do t’i shkojë OSBE/ODHIR për të dhënë vendimin.”, tha deputetja socialiste.
Ndërsa ish-deputetja e PD Dhurata Çupi e ka cilësuar një fitore të opozitës shqiptare dhe qytetarëve shqiptarë marrëveshjen e arritur sot për reformën zgjedhore. Nga paneli i të njëjtit emision, Çupi deklaroi se ishte një marrëveshje e kreut të PD-së Lulzim Basha me ndërkombëtarët duke përmendur edhe reagimet e ambasadave.
“Ajo çfarë sot është pozitive për politikën shqiptare është se kjo ishte një marrëveshje e zotit Basha me ndërkombëtarët. Kjo është dhe me deklaratat e përgëzimit nga ambasadat e BE, SHBA e OSBE. Do të veçoja deklaratën e SHBA. Kjo konsiderohet fitore e opozitës shqiptare dhe qytetarëve shqiptarë. Kjo është ajo çfarë sot qytetarët shqiptarë kanë prekur, një marrëveshje e opozitës, e zotit Basha me amerikanët, me Bundestagun gjerman për t’i dhënë shqiptarëve zgjedhje të lira e të ndershme”. Tha Çupi.
