Ndaj ish-kryebashkiakut të Vorës Agim Kajmaku rëndojnë tre akuza akuza të forta. Prokuroria e Përgjithshme ka përfunduar hetimet e saj dhe e akuzon Kajmakun për ‘falsifikim formulari’, ‘falsifikim dokumentesh e kryer në bashkëpunim’ dhe ‘tejkalim i ushtrimit të kompetencave përtej mandatit’.
Akuzat e Prokurorisë i janë komunikuar avokatit të tij Isuf Shehu, duke qenë se Agim Kajmaku vijon të jetë në arrati që prej nisjes së verifikimit që erdhi pikërisht pas akuzave të Partisë Demokratike.
Ishte Prokuroria e Përgjithshme ajo që kreu verifikimet ku doli me konkluzionet se
“Agim Kajmaku ka fshehur arrestimin dhe më pas hetimin në Greqi me një emër tjetër, Jorgo Toto, duke bërë që ai të jetë në kushtet që e kap ligji i dekriminalizimit”, në këtë përfundim ka dalë Prokuroria e Përgjithshme duke u bazuar në verifikimet e bëra.
Megjithëse gjykata greke e shpalli të pafajshëm në lidhje me akuzën e falsifikimit të kartëmonedhave, për drejtësinë shqiptare Kajmaku nuk i shpëtoi dot problemeve për shkak se arrestimin e vitit 2003 duhet ta kishte deklaruar në formularin e vetëdeklarimit që të gjithë zyrtarët duhet të dorëzojnë në Komisionin Qendror të Zgjedhjeve para se të hyjnë në garën për zgjedhje. /Fjala.al
