Ish-deputetja, Jorida Tabaku beson se programi që po harton partia e Lulzim Bashës do të luftojë korrupsionin dhe do të rimëkëmbë Shqipërinë.
Sipas Tabakut, Partia Demokratike në bashkëpunim me ekspertë ndërkombëtarë kanë hartuar një program, i cili synon ta kthejë Shqipërinë në vendin më tërheqës për investimet e huaja.
“Është një proces që ka kohë që ka nisur dhe nuk do të ndalojë pavarësisht nëqëoftëse kemi një dokument të përfunduar apo jo. Politika fiskale e PD-së nuk ka asnjë ndryshim dhe as një dyshim që do të jetë taksa e sheshtë. Nuk ka absolutisht asnjë kompromis për këtë sepse ne besojmë në filozofinë e taksës së sheshtë dhe përfitimet që do të ketë për të gjithë grupet e ndryshme nga qytetarët e thjeshtë te biznesi”, shprehet Tabaku.
Sipas saj, kjo do krijojë një klimë të favorshme ekonomike.
“Kjo është shoqëruar dhe me një plan të veçantë për nxitjen e investimeve të huaja për ta bërë Shqipërinë vendin më atraktiv për të nisur dhe për të mbajtur një biznes. E gjitha kjo është në shërbim të punësimit, uljes së varfërisë, rritjes së konsumit. E gjitha kjo lidhet me idenë që ka PD për ta bërë Shqipërinë vendin më atraktiv dhe më konkurrues në rajon”, shpjegon Tabaku./Fjala.al/
