Dy tërmete të njëpasnjëshme kanë goditur Kukësin dhe Dibrën mesditën e sotme, ndërkohë që lëkundjet janë ndjerë edhe në kryeqytet e disa zona të tjera në periferi.
Sipas Institutit të Gjeoshkencave, Energjisë, Ujit dhe Mjedisit (IGJEUM), tërmeti i orës 12:38, kishte magnitudë 3.8 të shkallës rihter dhe epiqendër në veriperëndim të Peshkopisë.
Ndërkohë, tërmeti i dytë i orës 12:52, kishte magnitudë 4.1 të shkallës rihter dhe epiqendër Krej-Lurë.
Lëkundjet e këtij të fundit janë ndjerë gjithashtu në Kukës, Tiranë, Maqedoni e Kosovë dhe tërmeti ka zgjatur disa sekonda.
Sipas informacioneve nga Ministria e Mbrojtjes, nuk raportohet të ketë dëme.
“Nuk raportohen dëme nga shtabet e Emergjencave Civile në këto dy bashki”, thuhet në njoftimin e Ministrisë së Mbrojtjes.
Kujtojmë se vendi ynë u godit nga tërmeti i fuqishëm i 26 nëntorit, ku si pasojë e dëmeve të shkaktuara humbën jetën 51 persona dhe mbetën të lënduar e të pastrehë qindra të tjerë.
Tërmeti i nëntorit pati magnitudë 6.4 të shkallës rihter dhe u shoqërua me pasgoditje të madhësisë 3-5 të shkallës rihter.
Sizmiologët e kanë cilësuar si normale dukurinë e paslëkundjeve pasi tërmeti i datës 26 nëntor ishte një tërmet i thellë, gjë që shkakton edhe tërmete më të vogla në vazhdim.
Informacionet e detajuara mbi përmasat e tërmeteve mund ti gjeni në këtë foto:
