Ndonëse ende nuk dihet asgjë mbi motivin e ekzekutimit të 28- vjetarit dibran në Tiranë, policia ka shpallur në kërkim një person dhe madje i ka nxjerrë edhe iniciale. Po ashtu ka bërë me dije se i ka bërë edhe kontroll banese mbrëmë, pak çaste pas atentatit.
Policia ka identifikuar dhe shpallur në kërkim një person të dyshuar për vrasjen që tronditi zonën e ‘Astirit’ mbrëmjen e djeshme.
Burimet tregojnë se Policia e Tiranës dyshon se Vilson Tafçiu u vra nga një person me inicialet N.D. madje mbrëmjen e djeshme pas vrasjes është kryer edhe një kontroll në banesën e tij, por nuk është gjetur. Tafçiu, që mbeti viktimë e këtij atentati, bëhet me dije se përveç Francës, ku ka qenë i arrestuar për trafik droge në mars të vitit 2018 dhe ku kishte qëndruar në paraburgim për 8 muaj para se të depërtohej drejt vendit tonë në nëntor të vitit të kaluar. Më pas mësohet se ka jetuar edhe në Belgjikë.
Pista e parë ku janë fokusuar hetimet është pikërisht e kaluara e tij në Francë dhe në Belgjikë dhe konfliktet për shkak të drogës, pasi në familje nuk ka pasur asnjë precedent. Për vrasjen ende nuk ka asnjë të arrestuar.
Sipas burimeve nga policia pas ngjarjes kamerat e sigurisë kanë kapur dy makina që kanë ikur me shpejtësi nga vendi i ngjarjes.
Njëra prej tyre është identifikuar dhe drejtuesi është ndaluar, por ka rezultuar se nuk kishte lidhje me ngjarjen dhe se ishte larguar nga frika pas atentatit. Ndërkohë që makina tjetër me ngjyrë të zezë që u largua me shpejtësi rezulton se është e autorëve të vrasjes, por ende nuk ka asnjë gjurmë të saj.
Shënjestra e atentatit, Vilson Tafçiu, prej tri ditësh qëndronte në Tiranë, pasi kishte ardhur nga Dibra për varrimin e gjyshes, që jetonte në Institut. Mësohet se viktima që njihej edhe me mbiemrin Noka, ishte i shoqëruar me dy persona në një lokal në rrugën “Teodor Keko” në zonën e ‘Astirit’, kur është thirrur në emër për të dalë jashtë dhe është qëlluar për vdekje me tre plumba në gjoks nga një person. n.k /Fjala.al/
