Në përfundim të mbledhjes së Kryesisë së Lidhjes Demokratike, Isa Mustafa i ka vendosur afat Albin Kurtit të Vetëvendosjes, për krijimin e Qeverisë së re.
Ai kërkoi që deri në fund të kësaj jave duhet të jetë arritur marrëveshja, ose të paktën VV të deklarojë se nuk ka kushte për të arritur marrëveshjen.
“Mendojmë se marrëveshja do të qetë në pah një qeveri të balancuar dhe përgjegjësi të balancuara ndërmjet dy palëve në harmoni me atë që qytetarët e Kosovës na kanë dhënë besimin me votën e tyre ne si LDK me 28 deputetë dhe LVV-së me 29 deputetë. Ne kemi dhënë një propozim që është shumë i balancuar që LVV duhet ta trajtojë me vëmendje të veçantë dhe mbetemi që të bisedojmë, por që ajo të ketë një përfundim sa më shpejt mundësisht deri në fund të kësaj jave, që të bëjmë marrëveshje ose të konstatojmë se nuk ka kushte që marrëveshja të bëhet”, u shpreh Mustafa.
Si VV, ashtu edhe LDK kanë bërë publike propozimet e tyre për krijimin e Qeverisë. Por pavarësisht disa javë negociatash, palët kanë ngecur te posti i kryetarit të Kuvendit, në të cilin është emëruar Glauk Konjufca i Vetëvendosjes, por ndërkohë LDK e synon që ta ketë të sajin./Fjala.al
