Inxhinierët amerikanë kanë bërë përojekje maksimale për të ndërtuar ndërtesa që të mbrojnë njerëzit nga sulmet me armë.
Ambicia e inxhinierëve ishte krijimi i një ndërtese inteligjente me synim trajtimin e situatave të sulmeve me armë. Inxhinierët e shkencave kompjuterike në Universitetin e Kalifornisë Jugore po përdorin realitetin virtual për të projektuar ndërtesa që mund të mbrojnë banorët e tyre.
Projektuesit do të shikojnë numrin e daljeve, vendeve të fshehura dhe nëse dritaret e qelqit duhet të jenë të tejdukshme apo të patejdukshme, bazuar në rekomandimet e ekspertëve qeveritarë dhe të sigurisë.
Së shpejti mësuesit dhe punonjësit e zyrës do të testohen për të parë se si reagojnë ata gjatë një incidenti të dhunshëm virtual të inskenuar brenda modeleve të ndryshme të ndërtesave të zyrave dhe shkollave.
Qelqi i patejdukshëm për shembull, mund t’i mbajë njerëzit të sigurt në një situatë si kjo, por mund të mos jetë ideale në rrethana normale, për shembull në rastet kur personeli shkollor dëshiron të shohë brenda një klase.
Kështu që një dritare me qelq të tejdukshëm mund të bëhet e patejdukshme kur ekziston kërcënimi.
Inteligjenca artificiale dhe sensorët në ndërtesa mund ta bëjnë këtë të mundur. Një ndërtesë inteligjente gjithashtu mund të prodhojë sinjalistikë digjitale që ua tregon banorëve daljet më të sigurta, larg dhunës dhe sulmeve me armë.
