Drejtoria e Përgjithshme e Tatimeve bën publike listën me 29 908 biznese që operojnë në të gjithë vendin, të cilat nuk kanë kryer brenda afateve detyrimet për taksa. Lista publikohet për ti ardhur në ndihmë bizneseve duan të hyjnë në marrëdhënie tregtare me këtë biznese, të njohin gjendjen financiare të tyre. Ndërkohë tatimet kanë nisur edhe mbledhjen me forcë të detyrimeve.
Në faqen zyrtare të Drejtorisë së Përgjithshme të Tatimeve thuhet se “Në këtë faqe është pasqyruar lista e tatimpaguesve me detyrime të papaguara në afat, ndaj të cilëve Administrata Tatimore, në zbatim të nenit 91 të Ligjit nr.9920, datë 19.05.2008 “Për Procedurat tatimore në Republikën e Shqipërisë”, ka vendosur marrjen e masave të sigurimit mbi të gjithë pasuritë për ekzekutimin e detyrimeve dhe se ka filluar procedura e mbledhjes me forcë të tyre”.
“Njoftimi bëhet që personat e tretë të marrin dijeni për fillimin e këtyre procedurave dhe që organet apo institucionet të cilët kanë bëre regjistrime të pasurive të luajtshme apo të paluajtshme të tatimpaguesve debitorë, të regjistrojnë detyrimin tatimor të papaguar si barrë mbi këtë pasuri dhe të mos lejojnë kryerjen e transaksioneve për transferimin e pasurive të tatimpaguesve debitorë, deri në momentin që detyrimi tatimor i papaguar të arkëtohet”-thuhet në njoftimin e tatimeve.
