Një grup prej shtatë deputetësh të opozitës, të drejtuar nga Lefter Maliqi kërkojnë interpelancë urgjence me ministren e Drejtësisë Etilda Gjonaj. Mësohet se interpelanca që kërkohet nga deputetët e opozitës ka në fokus kërkimin e llogarisë për situatën në burgje. Deputetët Lefter Maliqi, Artur Roshi, Andi Përmeti, Ramadan Gjuzi, Koçi Tahiri, Besnik Troplini, Suzana Topi, kërkojnë shpjegime nga Gjonaj për daljen e Dritan Dajtit nga burgu për vizita mjekësore në Tiranë, por dhe për shkarkimet që u bënë një ditë më vonë në IEPV Peqin.
Lefter Maliqi, që më herët ka mbajtur detyrën e zëvendës Drejtorit të Përgjithshëm të Burgjeve, do të pyesë ish-eproren e tij për transferimet dhe shkarkimet që janë bërë kohët e fundit në disa burgje në vend. Deputetët e opozitës do kërkojnë shpjegime nga Etilda Gjonaj për situatën e krijuar pas “xhiros” në Bllok të Dritan Dajtit, dhe në kërkesë kanë bërë publike dhe një pyetjet: Si i emëron e shkarkon drejtuesit?
Po ashtu 7 firmëtërët kërkojnë shpjegimet dhe për lirimet e bujshme që janë bërë në muajt e fundit, ku Endrit Dokle dhe Sardian Sulejmani lanë qelitë, dhe pse ishin dënuar deri në 25 vite. Kërkesa e tyre është depozituar në Kuvend, por ende nuk është caktuar data se kur do zhvillohet interpelanca.
