Tatimi progresiv, e aplikuar nga qeveria e kryeministrit Edi Rama, ka për qëllim që të bëjë bizneset të paguajnë më shumë. I ftuar në studion e lajmeve në Ora News, deputeti i PS, Ervin Bushati tha se qeveritë e majta mendojnë që bizneset duhet të paguajnë më shumë në shoqëri.
“Qeveritë e majta mendojnë që bizneset duhet të paguajnë pak më shumë në shoqëri, për të ndërtuar një shoqëri të përbashkët. Qeveritë e djathta mendojnë që biznesi duhet tatuar më pak dhe qytetarët nuk duhet të shijojnë të mirat e zhvillimit ekonomik. Ne mendojmë që biznesi duhet të paguajë pak më shumë, prandaj kemi pasur tatimin progresiv. Ata që përfitojnë më shumë nga ekonomia janë bizneset e mëdhaja. Kur ndërtohet një rrugë nuk e përdorin këmbësorët si puna jonë, e përdorin kompanitë kryesore rrugën dhe në 80% të rasteve rruga është ndërtuar për kompanitë. Ata do paguajnë më shumë taksa. Kjo është logjika jonë”, tha ai.
Bushati u shpreh i bindur se nuk do të ketë zgjedhje të parakohshme. Ndërsa theksoi se PD nuk del dot kurrë forcë e parë në Shqipëri.
“Nga 90 e këtej partia më e madhe në vend është PS dhe në 2021 kur të kërkojmë mandatin e rinovuar një besëlidhje të re me qytetarët do jemi me të njëjtën qeverisje, me të njëjtin program. Me kryeministrin Rama do kërkojmë një besëlidhje të re me qytetarët. Jemi partia më e madhe dhe kemi për të qenë partia më e madhe. Partisë më të madhe i takon të bëjë edhe mazhorancën. Prandaj është pak i dëshpëruar zoti Basha sepse nuk i dalin llogaritë. PD nuk del dot kurrë forcë e parë në zgjedhjet në Shqipëri. Pikë! Kjo është matematikë”, u shpreh Bushati.
