Duket se nuk do të ketë paqe mes forca politike në lidhje me një ide të opozitës për të hyrë në marrëveshje me partinë qeveritare për zgjedhjet e parakohshme. Palët kanë zgjedhur rrjetet sociale për të qartësuar opozicionet e tyre në këtë çështje.
Kështu është kreu i grupit parlamentar të PS-së Taulant Balla shuan çdo mundësi që mes opozitës dhe maxhorancës të ketë një marrëveshje për zgjedhje të parakohshme. Pas deklaratave të kreut të PD-së Lulzim Basha ditën e djeshme se marrëveshja për reformën zgjedhore do të prodhojë edhe zgjedhjet e parakohshme, Balla bën një qartësim në “Facebook”. Ai shkruan se kjo është një fantazi e re për të mbajtur ca muaj të tjerë me oksigjen simotrën dhe sivllezërit e aleancës jashtëparlamentare. Sipas tij, zgjedhjet e parakohshme nuk janë temë e dialogut dhe ky dialog ka nisur për reformën zgjedhore.
“Lulzim Basha paska “konfirmuar” marrëveshje për zgjedhje të parakohshme! Mbase kjo i vlen si një fantazi e re për të mbajtur ca muaj të tjerë me oksigjen simotrën dhe sivëllezërit e aleancës jashtëparlamentare dhe e mirëkuptojmë. Por zgjedhjet e parakohshme nuk janë temë e dialogut me atë aleancë, dmth as me Lulzim Bashën.
Dialogu ka nisur për Reformën Zgjedhore dhe brenda kornizës së qartë të rekomandimeve të OSBE/ODHIR. Prandaj nga Lulzim Basha dhe aleanca jashtëparlamentare mirëpritet çdo kontribut me ide për depolitizimin e administratës zgjedhore dhe për çdo rekomandim tjetër. Idetë jashtë kësaj kornize kryetari i PD mund t’i diskutojë dhe konfirmojë jashtë Parlamentit me aleancën e tij, por jo me Partinë Socialiste. Ndërkohë i kujtojmë Lulzim Bashës se Kodi Zgjedhor miratohet me 84 vota që Partia Socialiste nuk i ka! Prandaj ai bën mirë të mos i fyejë e ofendojë deputetët që janë në Kuvend me firmën e tij dhe të para-ardhësit të Monika Kryemadhit. Sepse jo për gjë, po nesër do të duhet edhe vota e tyre për të mbështetur dhe konfirmuar rezultatet e dialogut që po zhvillojmë dhe Lulzim Basha bën mirë të mos i provokojë në dëm të reformës!” /Fjala.al/
