Kampionati më i madh i futbollit shqiptar, Kategoria Superiore ka ngritur sot tiparin e javës së 20-të. Tre ndeshje të Superligës do të zhvillohen ditën e sotme ndërsa dy të tjerat janë lënë për nesër, të hënën e 3 shkurtit.
Momentalisht në Gjirokastër është duke u luajtur takimi midis Luftëtarit dhe kampionëve ende në fuqi, Partizanit, të cilët ndodhen në rezultatin 0-3. Ishte Solomon ai i cili zhbllokoi rezultatin në minutën e 2-të të lojës, duke i dhënë kështu tronditjen e parë gjirokastriteve, më pas në minutën e 18-të Rron Broja dyfishoi golat për Partizanin. Ndërsa, Melo shënoi rikthimin e fuqishëm të “Demave” të kryeqytetit duke shënuar golin e 3-të në minutën e 72-të të lojës. Rikujtojmë se Partizani kishte vuajtur shumë në ndeshjet e fundit duke marrë vetëm humbje, ndërsa gjirokastritet e renditur të parafundit në kategori u shkatërruan në stadiumin “Selman Stërmasi” nga Tirana me rezultatin 5-1.
Në orën 17:00 do të zhvillohen dy ndeshjet e tjera, ajo midis Flamurtarit dhe Kukësit në Vlorë dhe Tirana me Teutën në stadiumin “Air Albania”.
Takimi midis djemve të Vlorës dhe verilindorëve është i rëndësishëm për këta të fundit, të cilët duan të mbajnë të paprekur vendin e parë të kategorisë, ndërsa Flamurtari nga ana tjetër do donte të merrte një fitore pas një sezoni me vuajtje dhe humbje të shumta.
Ndeshja më e rëndësishme e kësaj jave konsiderohet ajo midis Tiranës dhe Teutës. Të dyja skuadrat janë pretendente për të marrë kreun e kategorisë dhe momentalisht bardheblutë e kryeqytetit renditen të dytët, ndërsa Teuta gjendet në vend të katërt me pikë të barabarta me Partizanin, por me një ndeshje më pak se kampionët.
Dita e nesërme na rezervon ndeshjet Bylis-Vllaznia dhe Laç-Skënderbeu. Bylisi ndodhet në vendin e 5-të në kuotën e 30 pikëve, ndërsa Vllaznia në të shtatin me 27 pikë. Të dyja skuadrat do tentojnë të marrin fitore për të kaluar te pozicionet e para dhe për të mos rrezikuar. Bylisi vjen pas humbjes në Durrës, ndërsa Vllaznia pas barazimit të bardhë 0-0 në takimin me Laçin.
Ndërsa në dyshen tjetër Skënderbeu rikthehet pas fitores 1-0 ndaj Flamurtarit në ndeshjen e zhvilluar në shtëpi.
Rikujtojmë se ndeshjet Tirana-Teuta dhe Flamurtari-Kukësi do luhen sot në orën 19:00, ndërsa Bylis-Vllaznia dhe Laç-Skënderbeu do mbahen nesër në orën 14:00./Fjala.al/Katerina Tafa/
